14 лютага — святкуе юбілей Байкова Вера Васільеўна – таленавітая, творчая жанчына, майстар па ткацтву, член Саюза народных майстроў Беларусі. 

За дваццацігадовы перыяд работы ў Глыбоцкім Доме рамёстваў Вера Васільеўна стварыла вялікую калекцыю тканых вырабаў, большасць якіх складаюць ручнікі і посцілкі, вытканыя ў розных тэхніках.

Майстар аднавіла тэхніку вырабу “кілімаў”, якія шырока выкарыстоўваліся ў побыце на Глыбоччыне. На курсах павышэння кваліфікацыі ў Віцебску і Мінску Вера Васільеўна авалодала чатырохнітовым відам ткацтва “дымка”, а таксама браным, выбарным відамі ткацтва, пляценнем паясоў “на дошчачках” і “на бердзечку”. Зараз у калекцыі майстра прысутнічаюць посцілкі, ручнікі, сурвэткі, выкананыя гэтымі відамі ткацтва.

У большасці ўзоры на тканых вырабах — гэта самастойныя распрацоўкі, аднак складаюцца яны з элементаў, якія здаўна выкарыстоўваліся ткачыхамі Глыбоччыны і зараз захоўваюцца ў фондах Глыбоцкага гісторыка-этнаграфічнага музея.

Да таго ж Вера Васільеўна аднавіла рэгіянальны мужчынскі і жаночы касцюмы. Складанасць дадзенай работы заключалася ў тым, што выкарыстоўваліся толькі вусныя апісанні, сабраныя ў экспедыцыйных паездках па вёсках Глыбоцкага раёна. Яна працавала па рэканструкцыі дзявочага касцюма гараджанкі ХІІ –ХІІІ ст.ст.

Вера Васільеўна – удзельнік выстаў народнага дэкаратыўна-прыкладнога мастацтва I і II Усебеларускага фестывалю народнага мастацтва “Беларусь – мая песня”. У 2003 годзе ўдзельнічала ў Днях культуры Віцебскай вобласці, якія праходзілі ў Мінску і Маскве. У абласным конкурсе па ткацтве “Матчыны кросны” у намінацыі “Ткацтва посцілак” занімала I-е месца ў 2003 і 2006 гадах. У 2007 годзе ўзнагароджана дыпломам за правядзенне лепшага майстар-класа ў рамках Рэспубліканскага фестывалю народных мастацкіх рамёстваў “Вясновы букет”, у 2008 годзе праводзіла майстар-клас па ткацтве на кроснах на Рэспубліканскім свяце працаўнікоў вёскі “Дажынкі-2008” у Оршы. 

З 2001 года яна з’яўляецца членам Беларускага саюза майстроў народнай творчасці.

Імя майстра Байковай В.В. унесена ў энцыклапедыю “Хто ёсць хто ў Рэспубліцы Беларусь” (2009). Яе вырабы дэманстраваліся на абласной выставе сувеніраў-брэндаў Віцебшчыны “Цвяток радзімы васілька” (2009). Вера Васільеўна праводзіла майстар-клас па ткацтве паясоў на абласным свяце працаўнікоў вёскі “Дажынкі-2010” у г.п. Расоны. У 2011 годзе ў выставачнай зале Глыбоцкага гарадскога цэнтра культуры праходзіла яе персанальная выстава. У гэтым жа годзе Байковай В.В. прысвоена ганаровае званне “Народны майстар Беларусі”.

Зараз Вера Васільеўна знаходзіцца на заслужаным адпачынку, але нягледзячы на гэта, прымае ўдзел у пасяджэннях народнага клуба майстроў народных мастацкіх рамёстваў “Крыніца”, аказвае метадыстам Глыбоцкага Дома рамёстваў кансультатыўную дапамогу ў распрацоўцы і стварэнні народных касцюмаў.

Віншуем нашу таленавітую зямлячку з юбілеем!

Жадаем з радаснай нагоды
Здароўе мець, са шчасцем быць,
Не знаць бяды, жадаем згоды,
Да ста гадоў Вам зычым жыць!
Няхай заўсёды Бог абараняе
Ад зла, хваробы і журбы,
І ласку шчодра пасылае
Сягоння, заўтра і заўжды!