2 лютага святкуе юбілей народны майстар Беларусі Скавырка Святлана Анатольеўна. Ураджэнка Гомельшчыны (вёскі Вішанка Рагачоўскага раёна), вучылася ў Нараўлянскай СШ, затым у Бабруйскім ПТВ  (1990). Вышэйшую адукацыю атрымала ў Мінскім дзяржаўны  педуніверсітэце імя М.Танка (факультэт эстэтычнай адукацыі, 2011). Пэўны час працавала мастаком-афарміцелем у Вілейскім Доме культуры.

У канцы 90-х гадоў Святлна ўладкавалася на працу ў Глыбоцкім Доме рамёстваў. І гэта стала лёсавызначальным момантам у біяграфіі мастачкі. 

Узначаліўшы ў 2005 годзе гурток выяўленчага мастацтва і роспісу па палатне, пачала дасканала  вывучаць тэхналогію роспісу. Аснову ведаў дала майстар Глыбоцкага Дома рамёстваў Таляронак Галіна Пятроўна. Віцебскія абласныя курсы павышэння кваліфікацыі работнікаў культуры далі дадатковыя веды аб традыцыйных беларускіх рамёствах, у тым ліку — аб маляваных дыванах.

Майстэрства роспісу па палатне вывучалася і ўдасканальвалася Святланай паступова і ўжо ў 2008 годзе ў выставачнай зале Дома рамёстваў адбылася персанальная выстава майстра “Паслядоўнікі творчасці Я.Драздовіча”. Менавіта там яна прадставіла свае ўласныя маляваныя дываны. З гэтага часу Святлана Анатольеўна — пастаянны ўдзельнік абласных і рэспубліканскіх выстаў декаратыўна-прыкладнога мастацва. 

У 2009 годзе ў Мінску ў Палацы Рэспублікі Святлана Скавырка прадстаўляла маляваныя дываны ў справаздачнай выставе народных майстроў Віцебшчыны. У гэтым жа годзе яна стала лаўрэатам абласнога свята-конкурса майстроў народнага малявання і сучаснага роспісу “Райскі сад” у намінацыі “Роспіс па палатну”, які праходзіў у межах ХVІІІ Міжнароднага фестывалю мастацтваў “Славянскі базар у Віцебску”. У 2016 годзе Святлане Скавырка прысвоена званне народны майстар Беларусі. 

Святлана ўжывае разнастайныя тэхнікі: трафарэт, штампы, вольны пэндзлевы роспіс. Яна прыдала маляванцы форму дэкаратыўнага пано, што дазваляе вельмі арганічна скарыстоўваць яе ў сучасным прыватным і грамадскім інтэр'еры. Адметнасцю яе стылю з'яўляецца вытанчаны раслінны малюнак і далікатнае ўвядзенне ў кампазіцыю тасьмы і іншых сучасных матэрыялаў.

 Мастачка арыентуецца на дываны Глыбоччыны і творчасць Язэпа Драздовіча, а таксама пашырае традыцыйныя матывы тэмамі народных святаў і фальклору. Шырока прадстаўлена ў маляванцы наша Глыбоччына: храмы, адметныя мясціны, выдатныя падзеі мінулага і сучаснага жыцця з'яўляюцца ях адлюстраваннем глыбоцкай гісторыі, так і папулярызатарам нашага горада і раёна.

Неаднаразова работы Святланы Скавыркі займалі прызавыя месцы на прэстыжных конкурсах. Так, за маляванку “Два анёлы” мастачка атрымала Гран-пры на міжнародным конкурсе “Фарбы нябёсаў”, які праходзіў у рамках “Славянскага базару ў Віцебску”.

Маляванкі Віцебскага Паазер’я маюць своеасаблівы мастацкі стыль, адметную кампазіцыю, дзякуючы гэтаму ў 2014 годзе яны былі ўнесены ў Дзяржаўны спіс нематэрыяльнай гісторыка-культурнай спадчыны.

Спрыяла гэтаму і Святлана Скавырка, якую па праву  можна лічыць носьбітам гэтай культурнай традыцыі на Глыбоччыне. Маляванкі мастачкі можна лічыць брэндам Глыбоцкага раёна.

 ЛІТАРАТУРА :

Анюціна, А. Імправізацыя / А. Анюціна // Веснік Глыбоччыны. – 2005. – 3 снеж. – С. 7.

Берникович Д. Майстрыца з Глыбоцкага раёна Святлана Скавырка стварае дзіўныя маляваныя дываны / Д.Берніковіч //  Культура . — 2020. — 15 апреля.

Віншуем з ганаровым званнем! // Веснік Глыбоччыны. – 2016. – 31 снеж. – С. 5.

Глінская, А. Гісторыя ў маляванках / А. Глінская // Веснік Глыбоччыны. – 2016. – 22 кастр. – С. 5.

Жыгуноў, А. Зямныя зоркі Святланы Скавыркі / А. Жыгуноў // Веснік Глыбоччыны. – 2017. – 1 крас. – С. 5.

Жыгуноў, А. Дываны, якія праславілі Святлану Скавырка / А.Жыгуноў // Народная газета. — 2017. — 26 мая

Курыловіч, Я. Кветкі райскага саду. Маляванкі Святланы Скавыркі / Я. Курыловіч // Алеся. — 2020. — №8.

Народныя майстры і мастакі Віцебшчыны. — Віцебск, 2011. — 440 с. — С. 176

Сауліч, У. Французы прыехалі ў Глыбокае, каб убачыць... Эйфелеву вежу / У. Сауліч // Вiцебскi рабочы. – 2006. – 24 кастр. – С. 4.

Скавырка, С. А. «Нібыта сам Язэп Драздовіч водзіць маёй рукой» / С. А. Скавырка ; гутарыў У. Сауліч // Сельская газета. – 2017. – 13 апр. – С. 15.

Скавырка Святлана Анатольеўна // Народныя майстры і мастакі Віцебшчыны / калектыў аўт.: Л. У. Вакар [і інш.]. – Віцебск : Віцебская абласная друкарня, 2011. – С. 176.

Хайноўская, А. Глыбокае – Пекін. Нечаканае суседства / А. Хайноўская // Веснік Глыбоччыны. – 2017. – 22 сак. – С. 5.

Шпакоўская, Г. Паслядоўнікі Язэпа Драздовіча / Г. Шпакоўская // Витебские вести. – 2014. – 26 апр. – С. 10.

Шушкевіч, У. Мелодыя маляванкі / У. Шушкевіч // Лепельскі край. – 2011. – 11 кастр. – С. 4.