Да Дня адзінства работнікі Шунеўскай бібліятэкі падрыхтавалі кніжную выставу “Беларусь. Народ. Дзяржава" і запрасілі на патрыятычную гадзіну вучняў мясцовай школы. 

Выстава складаецца з раздзелаў: “Я тут жыву”, “Беларускія эцюды”, “Я помню ўсё” і “Скарбы Радзімы”.

Кнігі, прадстаўленыя на ёй, адрасаваны чытачам малодшага і сярэдняга школьнага ўзросту і сталі адпраўнымі кропкамі, ад якіх пачыналіся аповеды пра нашу Беларусь. Бібліятэкары звярнулі асаблівую ўвагу дзяцей на кнігу У. Ліпскага “Я тут жыву”. Яна складаецца са звестак пра кожную вобласць нашай краіны. Вядома ж, большую цікавасць наведвальнікі праявілі да нашай Віцебскай вобласці. Затым адправіліся ў вандроўку па Мінску з дапамогай аднайменнай кнігі. Гартаючы яе, дзеці пабывалі на плошчы Герба і сцяга, у парку Чалюскінцаў, аквапарку, Нацыянальнай бібліятэцы Беларусі і полюбаваліся рознымі скульптурнымі кампазіцыямі, якія ёсць у Мінску.

Далей адбылося знаёмства з кнігамі пра прыроду Беларусі. Рубрыка “Я помню ўсё” нагадала дзецям пра Вялікую Айчынную вайну. Кнігі, змешчаныя на выставе, утрымлівалі ў сабе ўспаміны юных сведкаў той вайны. Найбольш зацікавіў вучняў раздзел “Скарбы Радзімы”. Тут яны даведаліся пра самы вялікі  аўтамабіль у свеце – наш беларускі самазвал БелАЗ, які  занесены ў Кнігу рэкордаў Гінеса як самы вялікі і магутны. Даведаліся пра трактар “Беларус”, які можна сустрэць не толькі на палях нашай краіны, а і ў свеце ў цэлым.

Бібліятэкары пастараліся данесці дзецям сэнс гэтага свята. Адзінства – гэта азначае, што ўсе мы адзіны ў любові да сваёй краіны. А калі любіш, то паважаеш яе гісторыю, памятаеш і шануеш продкаў, беражліва адносішся да прыроды, ганарышся адкрыццямі, добра вучышся, каб стаць гонарам для сваёй Беларусі і прыносіць ёй карысць у будучым.

17.09.2022г.                                             І. Нікіфаровіч