Вясна прыйшла ў Бібліятэку сямейнага чытання разам з выставай “Рукам - работа, душы - радасць”, прыўрочанай да Міжнароднага дня жанчын.

На выставе прадстаўлены вырабы рукадзельніцы Марыі Віктараўны Фурс з вёскі Празарокі. Тут можна ўбачыць лялькі-бабулькі з добрай і цёплай усмешкай, лялькі-абярэгі, казачных герояў, цыганак–гадалак, дзеда Мароза са Снегавіком. Лялькі розныя па памерах, па знешняму выгляду, але вельмі прыгожыя і добрыя, нагадваюць нашых бабуль, выклікаюць цёплыя ўсмешкі, настальгічныя ўспаміны аб дзяцінстве...  Гледзячы на іх адразу становішся маленькім і нібыта пападаеш у нейкую казачную атмасферу. У кожнай лялькі адчуваецца свой характар - дабрыня, хітрынка, прыветлівасць, ну сапраўды, як у людзей...

Выклікае павагу да майстрыхі дасканаласць вырабаў, акуратнасць сцяжкоў, дэталёвая праработка твараў, касцюмаў, упрыгожванняў.

Марыя Віктараўна нарадзілася на Міёршчыне ў вялікай дружнай сям’і, якая пераехала ў Празарокі. Пасля заканчэння школы яна адразу паступіла ў Магілёўскае вучылішча хімікаў. Пэўны час жыла і працавала ў Магілёве. Але тых прафесійных ведаў, што яна атрымала ў вучылішчы, было недастаткова і яна вырала паступіць у Наваполацкі тэхнікум. Пасля яго заканчэння і да самага выхаду на пенсію Марыя Віктараўна працавала на Полацкім шкловалакне, спачатку рабочай, а потым майстрам.

Калі Марыя Віктараўна выйшла на заслужаны адпачынак, пачала займацца творчасцю. Яна ўмее шыць, вязаць. Акрамя гэтага, Марыя Віктараўна добрая спявачка і адметная кулінарка. Адным словам, майстар на ўсе рукі.

Запрашаем пазнаёміцца з лялечнай выставай!