Асвечанай вярбы пукатыя галіны, дакладны знак на адыход зімы. Час роспачы мінуў! Адпушчаны правіны! Анёльскі хор пяе ўрачыстыя псалмы. 

Традыцыйна сябры Падсвільскай гарпасялковай бібліятэкі сабраліся разам з нагоды светлага свята. З аповеду вядучых удзельнікі мерапрыемства пазнаёміліся з гісторыяй свята, з традыцыямі кожнага дня велікоднага тыдня. Даведаліся шмат цікавага пра тое, як здаўна  было прынята сустракаць Светлае Хрыстова Уваскрасенне, а таксама аб старадаўніх народных традыцыях святкавання гэта дня. 

Гасцям прадставілі мастацкую літаратуру з выявамі, сюжэтамі і жанрамі велікодных апавяданняў. Прагучалі ўрыўкі з твораў, прысвечаных Светламу Уваскрэсенню. Затым бібліятэкар зрабіла агляд перыёдыкі з цікавымі ідэямі афармлення велікоднага стала, фарбавання  яек, стварэння святочных вырабаў і ўпрыгожанняў. 

Жанчыны ў сваю чаргу распавялі ўласныя сакрэты святкавання, рэцэпты прыгатавання выпечкі і размалёўкі яек.  

З задавальненем госці прынялі ўдзел у гульнях: “Біткі”, “Катане яек”, “Круціся яечка”  і інш. У завяршэнне сустрэчы было арганізавана чаяванне з велікоднымі кулічамі.  

На працягу мерапрыемства гучала адна думка — няхай Уваскрасенне Хрыстова прынясе ў нашыя сэрцы сапраўдную радасць, любоў i надзею, i няхай у гэтым вясновым свеце i ў кожным доме запануюць святло, дабрыня і чалавечая спагада!

Аўласевіч Н.К., бібліятэкар чытальнай залы Падсвільскай гарпасялковай бібліятэкі