10 красавіка ў памяшканні школы супрацоўнікі Карабоўскай сельскай бібліятэкі-клуба правялі фальклорную гадзіну «Вялікдзень: вытокі і традыцыі», на якую завіталі вучні 1 класа.

Бібліятэкар расказала дзецям пра гісторыю свята, яго сімвалы і традыцыі. Першакласнікі даведаліся, чаму на Вялікдзень фарбуюць яйкі, пякуць кулічы і асвячаюць велікодны кошык.

З цікавасцю дзеці паглядзелі “Мультик от Капельки “Что такое Пасха?" , а таксама паслухалі пра тое, як нашы продкі сустракалі гэты светлы дзень.

Але самае вясёлае чакала наперадзе – велікодныя беларускія гульні! Маленькія вучні з задавальненнем качалі яйкі з лубка: чыё яйка дакоціцца далей, той і перамог! А яшчэ большая радасць была, калі ўдавалася выбіць чужое яйка і тады яго забіраў пераможца! Потым адбыліся сапраўдныя «біткі» – дзеці з азартам біліся яйкамі, спрабуючы знайсці самае моцнае!

Напрыканцы мерапрыемства першакласнікі частаваліся Велікоднай булкай і салодкім чаем.

Фальклорная гадзіна прайшла ў цёплай, радаснай атмасферы. Дзеці не толькі пашырылі веды пра беларускія традыцыі, але і адчулі сапраўдны дух Вялікадня. Такія сустрэчы дапамагаюць выхоўваць павагу да народнай культуры з самага маленства.

Заг. Карабоўскай сельскай бібліятэкі-клуб Спалівіс Л.Ф.