“Ад казачнага аўторка да паэтычнай нядзелі”- так называлася выстава-тыдзень, прысвечаная Тыдню дзіцячай кнігі, які прайшоў у Шунеўскай бібліятэцы.

Аўторак запрашаў павандраваць па казках, серада – заняцца спортам, чацвер вучыў бяспечным паводзінам, пятніца – правілам этыкету, субота павышала інтэлект, а ў нядзелю можна было пачытаць вершы.
Вядома ж, вандроўка ажыццяўлялася з дапамогай кніг, якія былі размешчаны на выставе пад адпаведнымі рубрыкамі.

Малодшыя школьнікі далучыліся да свята, наведаўшы бібліяшоу “Чароўны парасон”. Мерапрыемства пачалося з гульні “Знаёмства”. Затым бібліятэкар расказала пра гісторыю ўзнікнення свята дзіцячай кнігі, прапанавала расказаць пра сваіх любімых казачных персанажаў.

 Адзін з іх, Оле Лукойе, завітаў да дзяцей. Вядома, што ў яго два парасоны - чорны, які дорыць спакойны сон, і каляровы, які пасылае каляровыя сны. І вось у Оле Лукойе здарылася бяда – вецер здзьмуў з каляровага парасона ўсе фарбы. Парасон стаў чорным.
Каб вярнуць яму рознакаляровасць – трэба выканаць заданні. Дзеці ахвотна дапамаглі Оле Лукоей у гэтай бядзе. Яны адгадвалі загадкі, па згубленай рэчы знаходзілі персанажа казкі, успаміналі казачныя заклінанні, збіралі “зоркі” і шукалі “месяц”. З кожным выкананым заданнем на парасоне з’яўляўся колер.
У выніку парасон быў выратаваны. Усе колеры вярнуліся на сваё месца!
Оле Лукойе ў знак удзячнасці абяцаў дзецям дарыць толькі цікавыя каляровыя сны.

Вучням 4-5 класаў бібліятэкары прапанавалі адзначыць “Імяніны кнігі” літаратурнай вандроўкай “Любоў да Радзімы праз кніг старонкі”.
Увазе юных чытачоў былі прадстаўлены зборнікі “Буслава айчына”, “Зямля мая”, кнігі Міхася Пазнякова “Мая цудоўная Радзіма” і “Радзіма наша Беларусь”, Анатоля Зэкава “Двор пад буслінымі крыламі”, кнігі Яніны Жабко, Уладзіміра Мазго, Уладзіміра Ліпскага і інш.

Праз апавяданні і вершы, літаратурныя замалёўкі і кніжныя ілюстрацыі дзеці бачылі прыгажосць нашай Радзімы, вучыліся любіць і берагчы сваё, роднае.

  Красавік 2026 г., заг. бібліятэкі І. Нікіфаровіч