Бібліятэкі Глыбоцкай ЦБС актыўна  далучыліся да правядзення Дня роднай мовы.

  Ва ўсіх бібліятэках былі аформлены кніжныя выставы і паліцы  ”У роднай мове — душа народа“, ”Беларуская кніга чакае вас!”, ”Жыве ў вяках беларуская мова“, ”Родная, жывая, непаўторная...“, ”Скарбонка беларускай літаратуры"...
   У бібліятэках праводзіліся цікавыя мерапрыемствы і акцыі. Для наведвальнікаў праводзіліся агляды новай літаратуры, рэтра-прагляды забытых кніг.

   Да Дня роднай мовы ў Падсвільскай дзіцячай бібліятэцы прайшла інтэлектуальная гульня “Родная мова, матчына мова, ззяе всялкай кожнае слова!”.
   Падчас мерапрыемства вучні пазнаёміліся з гісторыяй узнікнення свята. Яны з задавальненнем цікавіліся творамі беларускіх пісьменнікаў, прымалі ўдзел у конкурсах “Перакладчыкі”, “Перагавары”, адказвалі на пытанні віктарыны “Так ці не”, вымаўлялі скарагаворкі, карысталіся слоўнікамі, успаміналі прыказкі і прымаўкі, чыталі вершы на беларускай мове.
   Не абыйшлося і без цікавых тэматычных загадак. Чытачоў правяралі і на веданне беларускіх прымавак. У дапамогу была прадстаўлена кніжная выстава “Беларуская мова ад “А” да “Я”. Дзеці разам з бібліятэкарамі разгадвалі літаратурную крыжаванку, удзельнічалі ў гульні “Словазнаўцы”, выбіралі беларускія словы, расказвалі, што яны абазначаюць.
   У канцы падвялі вынік, што вельмі важна ведаць родную мову, правільна пісаць і гаварыць на ёй. А для павышэння пісьменнасці больш чытаць!

   Дзень роднай  мовы ў  Падсвільскай гарпасялковай бібліятэцы прайшоў пад назвай  “Рускай мове дай разгрузку – размаўляй па-беларуску!”.
   У бібліятэцы дзейнічала  тэматычная выстава  ”На мове, сэрцу зразумелай“. Для наведвальнікаў быў праведзены  паэтычны слайд-агляд ”Чарую душу родным словам“ па творах Генадзя Бураўкіна. Гучалі вершы вядомага паэта,  а мясцовая паэтэса Таіса Роліч прачытала свае вершы.
   На заканчэнне сустрэчы госці бібліятэкі прагледзелі відэаролік па вершах Генадзя Бураўкіна  ”І льецца мілагучнае слова, родная беларуская мова“, які падрыхтавалі ўдзельніцы жаночага клуба ”Сяброўкі“. 

   Культарганізатар  Карабоўскай сельскай бібліятэкі-клуба з вучнямі 5-8 класаў правяла моўную гадзіну ”Размаўляй са мной па-беларуску“.
   Вялася размова пра гісторыю ўзнікнення Міжнароднага дня роднай мовы, пра неабходнасць ведаць,  захоўваць і карыстацца беларускай мовай.
  Затым дзеці  адгадвалі загадкі, тлумачылі значэнне старадаўніх слоў, успаміналі прыказкі і прымаўкі,  чыталі вершы на роднай мове.

 

   Акцыя “Размаўляй са мной па-беларуску" 

   21 лютага да Міжнароднага дня роднай мовы на малодшым абанеменце Глыбоцкай дзіцячай бібліятэкі для дзяцей і іх бацькоў прайшла акцыя “Размаўляй са мной па-беларуску”. Была падрыхтавана выстава-знаёмства “Дзень добры, кніжка беларуская!” з наступнымі раздзеламі: “Жывая спадчына”, “Вясёлыя дзівосы” і “Беларускі кнігазбор”.
   На выставе змяшчаліся выказванні вядомых людзей пра беларускую мову. Весела праходзіла моўнае лато “Багата ты, роднае слова”. Удзельнікі гульні па малюнку адзначалі, што гэта за рэч і давалі яе правільную назву на рускай і беларускай мовах. Наведвальнікі бібліятэкі, якія прынялі ўдзел ў акцыі, былі ўзнагароджаны эмблемай “Мова родная – мова модная!”

Шэраг мерапрыемстваў былі праведзены ў пятніцу, у рамках праекта "Кожная пятніца — роднае, сваё"