Імя Якуба Коласа прыходзіць да нас са старонак першых кніг, прачытаных па складах і застаецца на ўсё жыццё. Колас дарыць нам велізарны паэтычны свет, напоўнены фарбамі, гукамі, пахам роднай зямлі. Свет гэты ўвабраў у сабе спакойную мудрасць і дабрыню беларускага народа, моцную веру ў яго шчасце, гарачую любоў да чалавека.
3 лістапада 2022 г. на Беларусі будзе шырока адзначацца знамянальная дата — 140 гадоў з дня нараджэння класіка нацыянальнай літаратуры. Да гэтай даты работнікі Падсвільскай гарпасялковай бібліятэкі арганізавалі "оpen-air"-мерапрыемства. Па-за сценамі бібліятэкі, у восеньскім скверы сумесна з удзельнікамі клуба “Сяброўкі” была створана паэтычная алея “Каб кожны Коласа пачуў…”
Яшчэ раз чытачы ўзгадалі паэта, чалавека, грамадзяніна, які ўсё жыццё аддана служыў Радзіме і роднаму народу. Расказалі пра пісьменніка і творцу, які паўвека аддаў роднай літаратуры, нёс людзям "агонь душы і сэрца жар".
Лёгкі восеньскі вецярок шырока разносіў над падсвільскай старонкай вершы Песняра, якія з любоўю чыталі сябры клуба.
Аўласевіч, Н.К., бібліятэкар чытальнай залы.
