У Глыбоцкай цэнтральнай раённай бібліятэцы 8 чэрвеня прайшла надзвычай цёплая сустрэча работнікаў культуры з беларускім празаікам, публіцыстам і, як высветлілася, апантаным краязнаўцам – Францам Іванавічам Сіўко.
Паколькі ў госці да глыбоцкіх бібліятэкараў віцебскі пісьменнік завітваў не аднойчы і разважаў на тэмы літаратурна-творчыя, таму ў гэты раз размову павёў у накірунку краязнаўчым. Каб аддаць даніну павагі Году гістарычнай памяці і зацікавіць сваёй даследчай працай родных мясцін, а магчыма, і натхніць на гэтую годную справу і кагосьці з прысутных.
Маленькая радзіма Франца Сіўко – вёсачка Вята, што на Мёршчыне.
Ваколіцы – жывапісныя. Да прыкладу, знакаміты мёрскі вадаспад знаходзіцца якраз у мясцінах родам з дзяцінства пісьменніка, у Міжрэччы.
Ваколіцы – з багатай гістарычнай спадчынай. Некаторыя свае даследчыя набыткі Франц Іванавіч дэманстраваў праз фотапрэзентацыю: родная хата, стары млын, землякі, рарытэтныя знаходкі з гарышча…
Неўзабаве Франц Сіўко плануе выдаць чарговую кнігу, краязнаўчую, на старонках якой будуць змешчаны яго даследаванні мясцовых мёрскіх тапонімаў. Падзяліўся творца і іншымі творчымі задумамі. А таксама "скіраваў" на знаёмства з уласнымі творамі на Ютуб-канале:
– Набярыце ў пошукавіку "ФРАНЦ СІЎКО" і слухайце іх у аўтарскім выкананні.
Які ж пісьменнік прыязджае ў госці без творчых падарункаў? І Франц Іванавіч падарыў свае дзіцячыя кніжачкі “Бобрык Плясік і Цімоша” Глыбоцкай дзіцячай і школьным бібліятэкам.
