Калі любіць чытаць і наведваць бібліятэку, то і канікулы можна правесці карысна і цікава.

4 лістапада Шунеўская бібліятэка запрасіла вучняў малодшых класаў наведаць літаратурную гасцёўню  па казках А.Карлюкевіча “Шубуршун і яго сябры”.

З кнігі “Прыгоды Шубуршуна”  дзеці даведаліся, хто такі Шубуршун, як ён выглядае, чаму адправіўся ў небяспечнае падарожжа па Свіслачы.

Паслухаўшы казку, дзеці паспрабавалі намаляваць героя кнігі Шубуршуна. Маленькі калматы камячок з вострай мордачкай і цікаўнымі вочкамі – такім яго апісаў аўтар. Дзеці стараліся стварыць падобны вобраз, і ўсё ж, у кожнага ён атрымаўся свой, непаўторны. Затым бібліятэкар прапанавала ім зрабіць караблік для падарожжаў Шубуршуна.

Дзеці “выпрабоўвалі” свае караблі  чый далей “заплыве” з дапамогай паветра.

 Знаёмячы з казкай “Памылка першакласніцы Святланкі”,  бібліятэкар звярнула ўвагу  на тое,што любыя справы трэба рабіць адказна, не перакладваць свае задачы на плечы іншых. За свае сумленна выкананыя заданні можна атрымаць узнагароду.

Зацікавілі дзяцей і такія  казкі як  “Падарожжа паштовай маркі”, “Крыніца паноў Ельскіх”, “Зорны шлях белых гарлачыкаў”, “Як васількі на сваю крыўду забыліся” і інш.

Завяршылася мерапрыемства гульнёй у “Казачнае лато”. Дзеці па малюнках, якія даставалі з куфэрка, павінны былі здагадацца з якой казкі і якому герою належыць прадмет.

5.11.2021г.                         заг. бібліятэкі І. Нікіфаровіч