Зіма  вымушае чалавека запаліць агонь, надзець цеплыя шкарпэткі, заварыць кубачак духмянай гарбаты, накінуць на плечы мяккі плед і заняцца любімай справай...  А яна ў кожнага розная ... Прагляд  тэлевізара, чытанне, вязанне...

Хоббі Таццяны Цітовай, работніка Глыбоцкай раённай бібліятэкі – рукадзелле. А гэта - вязанне спіцамі і шыдэлкам адзення і лялек, майстраванне штучных кветак з тканіны і паперы, бісерапляценне, вышыванне... Свайму любімаму занятку Таццяна аддае ўвесь вольны час.

Майстэрства ёй перадалі матуля з бабуляй, а развіваць талент Таццяна пачала сама, праз кнігі, часопісы, інтэрнет. Так з-пад умелых рук сталі з’яўляцца не толькі шалікі, шапкі, світары, сурвэткі.

Падушкі, лялькі, пінеткі, любая рэч падуладна ёй і можа быць ўвасоблена спіцамі або шыдэлкам. Талент і фантазія пабуджае Таццяну  вывучаць і спалучаць розныя тэхнікі рукадзелля. У будучым яна плануе заняцца біжутэрыяй. Бусы, калье, браслеты, бутаньеркі можна рабіць з рознага матэрыяла, поле дзейнасці вялікае...  

Вясна абуджае не толькі прыроду, алі і людзей... Першыя промні веснавога сонейкая асвятляюць мілыя рукатворныя вырабы, якія ў халодным зімовым святле глядзеліся па-іншаму.

Разам з вясной прыходзяць святы. Калі вы яшчэ не выбралі падарункі сваім родным і блізкім – дзядулям, бацькам і сыночкам,  бабулям, матулям і дочкам, сябрам і любімым – завітайце на выставу-кірмаш “Падарункі для каханых”. Там, сярод цудоўнейшых штучных вырабаў майстроў Глыбоцкага Дома рамёстваў, можна знайсці і работы Таццяны Цітовай.