У час вясенніх канікул Празароцкая сельская бібліятэка супрацоўнічала з дзіцячым аздараўленчым лагерам пры мясцовай школе. У рамках Тыдня дзіцячай кнігі прайшло літаратурнае свята для малодшых школьнікаў “Кніга мудры дарадчык і сябар”.

Дзецям прапанавана ў гульнёвай форме раскрыццё значнасці Кнігі ў жыцці чалавека. Вучні чыталі вершы па тэме, разгадвалі загадкі, удзельнічалі ў інсцэніроўцы “У кнігарні”, дакрануліся да вытокаў нараджэння нашай беларускай кнігі. Затым, напрыканцы конкурса казачных герояў у бібліятэцы “знайшоўся” Чабурашка са скрыні з апельсінамі і пачаставаў удзельнікаў мерапрыемства.

Папулярызацыя беларускай кнігі для школьнікаў малодшага і сярэдняга ўзросту прадоўжылася ў бібліятэцы на наступны дзень, як гутарка па кнізе Міколы Маляўкі “Сядзіба, або Хата з матчынай душою”.

Гэта кніга – пра тое, як жылі, працавалі і адпачывалі нашы продкі, якімі рэчамі гаспадарчага і хатняга ўжытку карысталіся, што было на іхнім стале ў будні і ў святы.

 «…родная сядзіба – гэта цэлы свет. Наперадзе, за таямнічай мяжою гарызонта, новыя дарогі, новыя людзі, новы свет. Але на ўсё астатняе жыццё застаюцца ў памяці «парог, высечаны з успамінаў; дзверы, зашклёныя вачамі блізкіх; хата, пакрытая крыламі ластавак…

Часцей азірайцеся, сябры, назад, у мінулае, каб не пагасла свечка на покуці — у хаце з матчынай душою, каб лягчэй было ісці наперад, у будучыню», — піша аўтар, цытуючы радкі з верша  народнага паэта Беларусі Максіма Танка.

Сенцы, прызба, лаўка, палаці, кадаўб, кублец, жлукта, балея, варыўна, цэбар, ражка… Ці адразу сучасны чалавек скеміць, пра што гаворка? Дзеля чаго  ведаць гэтыя састарэлыя словы, калі сёння гаджэты, дэвайсы, смартфоны, анлайн трансляцыі кіруюць жыццём? Але жыццё развіваецца па спіралі. Стомленыя імклівым гарадскім тэмпам, усё часцей людзі сем'ямі вяртаюцца ў вёскі. Расце попыт на экалагічныя прадукты, экалагічны лад жыцця – і названая кніга зноў становіцца надзвычай актуальнай!

А яшчэ тут шмат гумару, цікавых гісторый, народных прыкмет, прыказак, прымавак, загадак і таленавітых вершаў паэта Міколы Маляўкі. Выдатныя ілюстрацыі і дызайн Яўгена Ларчанкі знаёмяць з кожным прадметам, апісаным у кнізе, робіць яскравым і незабыўным. У фінале сустрэчы з кнігай дзеці дзяліліся сваім бачаннем жыцця нашых продкаў.

Бібліятэкар Празароцкай сельскай бібліятэкі В.І.Бурэнь