Адышоў апошні месяц лета. Адзначыўся ён не толькі ўраджаем гародніны і садавіны, але і мерапрыемствамі. Супрацоўнікі бібліятэк імкнуліся правесці іх пакуль цёпла і суха, больш вольнага часу  ў вяскоўцаў (працоўны адпачынак у дарослых, канікулы ў дзяцей), бо наперадзе вельмі напружаны месяц – верасень. Мерапрыемствы прайшлі значныя – святы вёсак. Для вясковага жыхара гэта вельмі запамянальная падзея.

  “Дарагі з дзяцінства сэрцу любы край” – пад такой назвай 16 жніўня  праходзіла свята вёскі Гатаўшчына. Мерапрыемства ладзілася сумесна   са старшынёй Пліскага сельскага выканаўчага камітэта  В. М. Пліско,  вядучым спецыялістам  ААТ“Сельцы “ па ідэалагічнай рабоце Т.У. Пашукевіч   і супрацоўнікамі Гатаўшчынскай бібліятэкі –клуба Грыдзюшка З.І.  і Пацянкоўскай В.Ф. Прысутнічалі госці з раёна – старшыня Глыбоцкага Савета дэпутатаў В.М. Цяліца, начальнік аддзела па адукацыі Т.В. Гаўрылава,  дырэктар сельскагаспадарчага ўнітарнага прадпрыемства “Мнюта” Ж.П. Шынкевіч  і  старэйшы навуковы супрацоўнік Глыбоцкага гісторыка-этнаграфічнага музея А.В.Хайноўскі.        Хоць лета для вёскі – гэта працоўная пара, але людзі не абмінулі святочную пляцоўку, якая размясцілася  на самым прыгожым і ўтульным месцы ўстановы. Сюды завіталі практычна ўсе аднавяскоўцы: людзі маладога ўзросту, дзеці, старэйшае пакаленне, шматдзетныя сем’і. Вельмі шмат   цёплых і добразычлівых слоў прагучала ў адрас аднавяскоўцаў,  як ад кіраўніцтва гаспадаркі, так і ад гасцей свята.

Музычныя падарункі дарылі артысты сектара па нестацыянарным абслугоўванні насельніцтва філіяла №7 Глыбоцкі ЦТКНТ.

    Бібліятэкар  Чарневіцкай бібліятэкі Пратасевіч Н.Ф. актыўна ўдзельнічала ў падрыхтоўцы і правядзенні свята вёскі Сахнавічы, якая на сённяшні дзень не мае ні аднаго пастаянага жыхара. Дзякуючы таму, што вёска знаходзіцца побач з прыгожым і таямнічым возерам Гінькава,  тут шмат дачнікаў, а таксама  гаражан, якія нарадзіліся і выраслі  тут, а зараз адраджаюць бацькоўскія сядзібы. Свята атрымалася. Сабралася шмат людзей, гучалі песні і вершы, успаміны аб мінулым Сахнавіч, былі ўручаны падарункі. Радавалі  прысутных сваімі песнямі ўдзельнікі мастацкай самадзейнасці Чарневіцкага дома культуры.

  Упершыню, весела і масава прайшло свята вёсак Кавалі и Мацясы, якое мела назву “Са святам, родная вёсачка!”. Панадворак самай старэйшай жыхаркі  Краўчонак Вольгі Цімафееўны быў упрыгожаны саматканамі дыванамі, ручнікамі, палавікамі. Сустракалі гасцей яе дочкі Раіса Мікалаеўна і Алена Мікалаеўна, старэйшына вёскі Сауліч Раісай Іванаўнай і загадчык Абрубскай бібліятэкі-клуба Цімафеева Святлана Фёдараўна, якія і падрыхтавалі святочную пляцоўку. Гасцямі былі жыхары вёсак, іх родныя, а таксама старшыня Абрубскага сельсавета Славецкі Анатоль Міхайлавіч, упраўляючы справамі Піскуновіч Маргарыта Яўгенаўна, дырэктар УП “Каралі” Піскуновіч Міхаіл Міхайлавіч. Узнагароджвалі ад старэйшых  жыхароў да самага маленькага. Не абдзялілі ўвагай не адну хату. Усіх заўважылі і кожны атрымаў падарунак. Музычны настрой дарылі артысты сектара па нестацыянарным абслугоўванні насельніцтва філіяла № 7 Глыбоцкі ЦТКНТ.

   Супрацоўнікі  Падсвільскіх бібліятэк – дарослай і дзіцячай - у межах свята паселка “Падсвільскі світанак” аформілі выставу падушак. Работы прадстаўлены карыстальнікамі бібліятэкі і народнымі майстрамі. Падушкі выкананы ў розных тэхніках: вышыўка, пэчворк, аплікацыя, вязаныя кручком і спіцамі.