У нас сёння Масленіца,
Прыляцела ластавіца,
Сядзела на тыну, на калу,
Кідала масла па каму.

А хто ўхопіць - так таму.
Маладая дзяўчына схапіла
Ды ў чарапочку стапіла...
У нас сёння Масленіца...

Так весела і звонка дзіцячымі галасамі праводзілі зіму і сустракалі вясну ў Залессі. Бібліятэкар Запрудскай сельскай бібліятэкі прыняла ўдзел у святкаванні Масленіцы, якое арганізавалі работнікі  Запрудскага Дома фальклору і вучні Залескай школы, удзельнікі фальклорнага калектыву "Весялуха", метадыст па фальклору Н.У.Нікіфаровіч і старшыня Залескага сельскага савета Б.І.Заяц.  

У работнікаў культуры вёскі Запруддзе стала добрай традыцыяй знаёміць дзецей з народнымі святамі і вучыць іх святкаваць па-даўнейшаму. Дзеці рознага ўзросту з задавальненнем калядуюць, смакуюць велікодныя булкі, водзяць карагоды на Купалле... Для іх даўнія народныя традыцыі і святы паступова ўваходзяць у рэальнае жыццё. Гэтаму спрыяе і работа бібліятэкара, які пастаянна прапаноўвае сваім юным чытачам кнігі пра беларускую культуру, этнаграфію і фальклор.  

Разам з Масленіцай дзеці атрымалі майстар-клас ад Марыны Хрол па стварэнню Маслянога барана, які на Глыбоччыне звычайна рыхтуюць гаспадыні да Вялікадня.

Незвычайная дзея выклікала цікавасць у школьнікаў і спадзяванні ў  дарослых, што такі баран з Мнюцкай стронкі ў хуткім часе з'явіцца і на Залесчыне!..

Гаравая Г., бібліятэкар Запрудскай сельскай бібліятэкі