…Духоўным бацькаў называў народ,
Тэатра бацька стаў сваёй Айчыне.
Гады сукае веку калаўрот
Ды памяць не губляецца аб сыне.
В.Гарановіч
Імя Ігната Цярэнцьевіча Буйніцкага ярка ўпісана ў гісторыю беларускага тэатральнага мастацтва. Шмат навуковых прац, мастацкіх твораў прысвечана нашаму славутаму земляку. Янка Купала, Змітрок Бядуля, Уладзімір Караткевіч, Уладзімір Няфёд і іншыя напісалі шмат літаратурных і даследчых твораў, дзеля таго, каб паказаць маштаб асобы стваральніка беларускага прафесійнага тэатра.
Напярэдадні 161-й гадавіны з дня нараджэння Ігната Буйніцкага прадстаўнікі мясцовай грамадскасці вёскі Празарокі ўшанавалі яго памяць. Да помніка на магіле земляка былі ўскладзены кветкі, перад прысутнымі з удзячнасцю “дзядзьку Ігнату”, які праславіў нашу мясцовасць, бібліятэкар Валянціна Бурэнь узгадала радкі Змітрака Бядулі :
”Ігнат Буйніцкі,наш артыста,
Гарачым сэрцам і агністым
Мастацтву роднаму адданы.
Каханы ўсімі і жаданы,
На сцэне маляваў жыццё
Народу беднага свайго.
Нам паказаў у жывой ігры
Наш беларускі быт стары.
Ён нам тлумачыў дух народны.
Яскравасць пекнай мовы роднай
І прымушаў усіх кахаці
Свой родны край, гаротну маці.
І так вылічылась сям’я,
Што йшла да лепшага быцця.
Магільным сном заснуй Ігнат,
Замнога, Божа, маем страт.
Настаўніца гісторыі Марыя Сулімава звярнула ўвагу аднавяскоўцаў на адметнасць дзейнасці Ігната Буйніцкага, які ахвяраваў здароўе, уласныя грошы, само жыццё дзеля абуджэння нацыянальнай годнасці беларусаў.
Пасля ўдзельнікі мерапрыемства наведалі Празароцкую сельскую бібліятэку і пазнаёміліся з новымі матэрыяламі выставы ”Бацька беларускага тэатра”, якая пастаянна дзейнічае і сэнс яе - ушанаванне памяці тэатральнага дзеяча, артыста, рэжысёра, арганізатара сцэнічнай справы ў Беларусі дакастрычніцкай пары.
Бібліятэкар Празароцкай сельскай бібліятэкі В.І.Бурэнь
23 жніўня 2022 года
