Першае ў гэтым годзе пасяджэнне падлеткавага клуба “Нашчадкі” у Шунеўскай бібліятэцы было прысвечана жыццю і побыту беларусаў. Этнаграфічны ўрок “Хатка з матчынай душою” дазволіў бліжэй пазнаёміцца з даўнімі рэчамі сялянскага ўжытку, з мноствам прыкмет і павер’яў, звязаных з гэтымі прыладамі.
З дапамогай відэапрэзентацыі дзеці мелі магчымасць наглядна ўбачыць як выглядае печ, прасніца, кросны, маслабойка, гліняны посуд, плеценыя кашы, карабы, вярэнькі, лапці, саматканыя дываны, кажухі, пашытыя з авечай скуры, валёнкі, зваляныя з воўны. Дзеці ахвотна расказвалі што з гэтых рэчаў яны бачылі раней, што захавалася ў іх бабуль і сёння.
Для замацавання пачутага, прысутным былі прапанаваны загадкі. Хуткія і правільныя адказы дзяцей сведчылі аб тым, што тэма іх захапіла, а пераклад нязвыклых беларускіх слоў на рускую мову стаў для іх вельмі цікавым спаборніцтвам на дакладнасць адказаў. Некаторыя прыкметы і павер’і, звязаныя з печчу, парогам, хлебнай дзяжой, пра якія расказвала бібліятэкар, аказаліся ім знаёмымі, а некаторыя наадварот- нязвыклымі і цікавымі.
Напрыканцы мерапрыемства дзеці бліжэй пазнаёміліся з кнігай М. Маляўкі “Сядзіба, або Хата з матчынай душою”, у якой сабраны абразкі з жыцця вёскі,перасыпаныя народнымі прыкметамі, прыказкамі і прымаўкамі, жартамі, загадкамі. А вершы, якія таксама змешчаны ў кнізе, напаўняюць яе душэўным святлом.
Вынікам пасяджэння стала тое, што шмат павучальнага і цікавага было ў жыцці нашых продкаў, а наша задача ведаць, захоўваць і берагчы гэтае багацце для нашых нашчадкаў.
30.01.2019 г. Заг. бібліятэкі Нікіфаровіч І.Ф.
