Шэраг цікавых мерапрыемстваў ,прысвечаных беларускай мове і літаратуры падрыхтавала для сваіх чытачоў бібліятэкар Псуеўскай сельскай бібліятэкі.

Падчас турніру знаўцаў казак, прымавак  і  прыказак  “Мудрыя дарадцы”  дзеці праявілі  творчую фантазію, кемлівасць, паказалі добрае веданне беларускіх прыказак, прымавак, казак. Юныя чытачы   актыўна прымалі ўдзел у прапанаваных  заданнях:хто больш ведае прыказак і прымавак на  розныя тэмы;пазнай казку па пачатку;закончы прыказку ; знайдзі пару і інш. Мерапрыемства садзейнічала ўзбагачэнню слоўнікавага запасу вучняў, далучыла іх да таямніц роднай мовы, выклікала цікавасць да яе.

  Складанкі-чытанкі “Азбука Васі Вясёлкіна”  былі прымеркаваны   да 110- годдзя з дня нараджэння  беларускага пісьменніка Васіля Віткі.У пачатку мерапрыемства бібліятэкар зазначыла, што вось ужо  больш за 60 гадоў “Вясёлка” радуе дзяцей шматколернасцю, прыгажосцю афармлення, багаццем пазнавальнага матэрыялу, гумарам, гульнямі, цікавымі творчымі заданнямі. Першым галоўным рэдактарам часопіса быў Васіль Вітка – славуты паэт-казачнік, таленавіты педагог, класік беларускай літаратуры,юбіляр 2021 года. Разам з ім з’явіўся на старонках часопіса літаратурны герой Вася Вясёлкін.  У часопісе вельмі многа вершаў, апавяданняў, прысвечаных нашай Радзіме, роднай мове, беларускай кнізе, роднай зямлі, роднай маці, роднай Айчыне. Дзеці з задавальненнем разгадвалі крыжаванку “Вясёлы герой часопіса”,крыжаванку-рыфмаванку “Вясёлка” ,загадкі-блытанкі, разам чыталі смяшынкі і небыліцы.

З цікавасцю прынялі ўдзел чытачы  і ў прэзентацыі  выставы-прапановы “Беларуская кніга: сядай і чытай”. Бібліятэкар  зрабіла невялікі экскурс  у гісторыю  і культуру роднай мовы, патлумачыла, што родная мова — генетычны код любой нацыі, які патрэбна любіць, шанаваць і берагчы.Адчуць прыгажосць і хараство роднай мовы  дапамог невялікі агляд твораў беларускай літаратуры. З цікавасцю адказвалі прысутныя і на пытанні віктарыны “Хто ёсць хто?” , якія датычыліся  герояў вядомых літаратурных твораў,  пісалі водгукі аб роднай мове  на стыкерах і прыклейвалі  іх на  маляваную карту Беларусі. Напрыканцы дня ўся карта  была ў “сэрцах” са словамі,якія яскрава  характырызуюць  беларускую мову:  прыгожая і мілагучная, адметная і сакавітая, дзіўная і цудоўная,непаўторная і крынічная!                                

20/04/2021 Паўлоўская Г.М.,бібліятэкар Псуеўскай с/б