Напярэдадні Дня бібліятэк у Шунеўскай бібліятэцы стала ўжо традыцыяй запрашаць першакласнікаў на экскурсію. “Книги знаньем славятся – читайте, вам понравится!” – пад такой назвай яна праходзіла на гэты раз.

 Юныя наведвальнікі папоўнілі рады чытачоў . Загадчык бібліятэкі расказала пра тое, як трэба паводзіць сябе ў бібліятэцы, як карыстацца кнігамі, дзе знаходзіцца літаратура для іх узросту.  Захапілі дзяцей кнігі незвычайнага фармату, а самую маленькую кніжку і самую вялікую - кожнаму захацелася патрымаць у руках.

У чытальнай зале дзеці мелі магчымасць пагартаць газеты і часопісы для свайго ўзросту, пазнаёміцца з рознымі дзіцячымі энцыклапедыямі.

Таксама да Дня бібліятэк на працягу тыдня працавала выстава-здзіўлялка “Кніжныя прыбамбасы”.

Дзеці на ёй маглі пазнаёміцца з кнігамі, якія можна “ажывіць” або “паслухаць” з дапамогай спецыяльнага мабільнага дадатку. Бібліятэкары расказвалі і паказвалі як правільна гэта зрабіць. Дзеці малодшага ўзросту маглі ўспомніць казку “Рэпка”, размясціўшы персанажаў у правільным парадку, праверыць сваю ўважлівасць, правільна размясціўшы карцінкі з вокладкамі кніг на паліцы.

Дарослыя чытачы правяралі свае веды, выканаўшы спецыяльныя заданні: “падбяры кнігі па запыту", "расшыфруй назву кнігі", "значэнне крылатых выразаў"  інш.”

На выставе размяшчалася дошка з крылатымі выразамі пра кнігу і  чытанне, а закладкі, выкананыя ў фармаце коміксаў, напаміналі пра правільныя адносіны да кнігі.

15.09.2025г.                                         І. Нікіфаровіч