Так, ужо далёка не люты. Але часопісы чакаюць свайгог чытача. Газета "Звязда" прапануе  агляд лютаўскай «Маладосці»: Жаданні і здзяйсненні

У лютаўскім нумары «Маладосці» прозу і паэзію прадстаўляюць Юлія Макарэвіч (друкуецца яе апавяданне «Запаветнае жаданне»), Марына Варабей (змешчана яе вершаваная падборка «Дыхаем пра адно і тое»), Ліндо Рандзір (знаёмцеся з яго апавяданнем «Дзяўчына Міра»), Ірына Чачотка (паэтка сярод іншых твораў знаёміць з вершам «Каліна зімы», які адрасуе «Памяці Я. Янішчыц), Яна Нікіфарава (паэтэса, аўтар двух зборнікаў, у «Маладосці» выступае з двума кароткімі апавяданнямі), Яна Цэгла (адрасуе чытачу падборку казак), Андрэй Кімбар (не абмініце яго вершаваную падборку «Золку чароўныя сполахі»). Выступаюць у нумары і пісьменнікі старэйшага пакалення: Навум Гальпяровіч з маленькай аповесцю «Горад», Хведар Гурыновіч з падборкай вершаў «Полымя, вада, жанчына», Уладзімір Мазго з цыклам лірычных мініяцюр «Знічкі вечнасці». 

Уражлівай падаецца публікацыя ў раздзеле «Пераклады» — «Маладосць» друкуе пераклады апавяданняў Джэймса Джойса «Эвэлін», «Маці», «Трагічны выпадак». Над пераўвасабленнем твораў вялікага ірландскага пісьменніка рупіліся студэнты Мінскага дзяржаўнага лінгвістычнага ўніверсітэта Андрэй Палуян, Марына Макарыч, Кацярына Гулецкая. 

Дасведчаны архівіст і літаратуразнаўца Віктар Жыбуль падрыхтаваў для «Маладосці» дзённікавыя запісы Алеся Наўроцкага, аб’яднаныя адной назвай — «Споведзь». З прадмоўкі да публікацыі: «...„Споведзь“ — гэта, можна сказаць, спалучэнне дзённікавага, мемуарнага і белетрыстычнага жанраў, а месцамі і журналісцкага рэпартажу: пісьменнік не без іроніі занатоўваў пачутае на канферэнцыях медработнікаў і сесіях сельсавета. Яшчэ адна частка, пад назвай „Запісная кніжка (Калі я працаваў санфельчарам)“ увабрала ў сябе пачутыя дыялогі, жарты, прыказкі, прымаўкі і асобныя словы». Да 100-годдзя з дня нарадждэння народнага мастака СССР Міхаіла Савіцкага выступае з артыкулам Юлія Кавалёва. Знойдзеце ў лютаўскай «Маладосці» і інтэрв’ю публіцыста Зіновія Прыгодзіча з Уладзімірам Слабодчыкавым «Скульптура — мастацтва без слоў». Наконт пытання, ці не састарэў жанр рамана, разважаюць Алег Ждан, Кацярына Хадасевіч-Лісавая, Генадзь Аўласенка. 

Паверце, у лютаўскай «Маладосці» ёсць што пачытаць. Не пашкадуеце, адкрыўшы гэты нумар часопіса. 

Мікола БЕРЛЕЖ, газета "Звязда"