26 студзеня у Падсвільскай горпасялковай бібліятэцы сабраліся прыхільнікі паэзіі, а менавіта на прэзентацыю новага зборніка вершаў Таісы Роліч “У святле матулінай зоркі”. Зборнік яна прысвяціла году малой Радзімы.

Мы даведаліся, як ствараўся зборнік, якую мэту аўтар ставіла перад сабою і што адчувае сёння, калі трымае яго ў руках.

Праз паэтычнае слова Таіса Міхайлаўна яшчэ раз нагадвае, як важна любіць і берагчы той край, які даў табе жыццё і адкрыў прыгажосць роднага слова. У сваіх вершах аўтар разважае пра жыццё, імкнецца пазнаць яго сэнс, прызначэнне чалавека на зямлі,  шчасце і ідэалы, да якіх трэба імкнуцца. Нямала вершаў прысвечана каханню.

Самабытныя кампазітары Падсвілля і Глыбокага заўважылі і адчулі, што вершы Таісы Роліч лірычныя і добра кладуцца музыку.  Песні выконваюцца не толькі на мясцовай і раённай сцэне. З імі ўдзельнічаюць на раённых і абласных конкурсах. На прэзентацыі  прагучалі некалькі песен у выкананні самадзейных кампазітараў Вольгі Лубчонак і Уладзіміра Бурэня. Жаночая вакальная група “Падсвільчанка” выканала песню “Провинциальный городок”.

  Cвяты, сустрэчы, на якія запрашаюць Таісу Міхайлаўну, натхняюць  яе на стварэнне паэтычных віншаванняў. Некаторыя з іх увайшлі ў зборніку. Цікава было даведацца, што старэйшая ўнучка Таісы Роліч, Ганна, спрабуе рыфмаваць. І за дапамогай заўсёды звяртаецца да бабулі.

Трэба зазначыць, што на вокладцы зборніка - малюнкі самога аўтара.

Амаль дзве гадзіны працягвалася сустрэча. прыхільнікі творчасці сваёй зямлячкі шчыра парадаваліся новай падзеі, якая адбылася ў Таісы Міхайлаўны  і пажадалі, каб яшчэ доўгія гады яна радавала нас сваёй шчырай і непаўторнай паэзіяй.

Аўласевіч Н.,  27.01.2020