Па-першае, трэба пазнаёміцца з кнігай В.Воранава "Дударская Глыбоччына", якая маецца ў фондзе Глыбоцкай цэнтральнай раённай бібліятэкі.

Кніга апавядае пра гісторыю дударскай традыцыі ў Глыбоцкім краі і на Паазер'і ў цэлым. У выданні згадваюцца славутыя дудары найбольш дударскага, па словах аўтара, рэгіёну Беларусі. Значная частка кнігі прысвечаная дударскім матывам у літаратурнай творчасці пісьменнікаў Глыбоччыны.

Аўтар таксама згадвае друкаваныя і іншыя крыніцы, звязаныя з дударскай спадчынай у рэгіёне і прадстаўляе розныя перспектывы развіцця дударскага брэнду ў раёне. Выданне багата ілюстраванае архіўнымі і сучаснымі фотаздымкамі. Кніга будзе цікавая краязнаўцам, гісторыкам, людзям якія цікавяцца пытаннямі культуры ў нашым краі, але паколькі гэта першае выданне такога тыпу, то таксама шырокай дударскай супольнасці Беларусі.

Нефармальная прэзентацыя кнігі адбылася падчас І-га дударскага фэсту ў Глыбокім. Тады таксама госці фэсту змаглі набыць сабе ўласны асобнік.

ІІ-гі фэст з удзелам дудароў з Бельгіі, Польшчы, Сербіі, Славакіі, Харватыі і Беларусі адбудзецца 4-6  траўня 2018 года.

Дудары, якія будуць прадстаўляць розныя дударскія рэгіёны Еўропы выступяць у Глыбокім, а таксама ў Плісе, Празароках, Удзеле і Мосары. У межах фэсту плануецца шэраг культурных мерапрыемстваў - вечарына "Дударскі рэй", адкыццё выставы выцінанкі Наталлі Сухой і яе майстар-клас, гала-канцэрт, прэзентацыя клуба беларускай нацыянальнай кухні.