4 мая 2019 г. у Глыбоцкай цэнтральнай раённай бібліятэцы ў рамках ІІІ-га Міжнароднага фестывалю дударскіх рэгіёнаў “Дударскі рэй --2019” прайшла прэс-канферэнцыя. Яе ўдзельнікамі сталі госці фестывалю, дудары з Харватыі, Македоніі, Польшчы і прадстаўнікі сродкаў масавай інфармацыі Глыбоцкага раёна.

На пачатку са cловамі прывітання замежных гасцей выступіла загадчык аддзела ідэалагічнай работы, культуры і па справах моладзі Л.Ф.Карніловіч. Яна ўручыла гасцям дыпломы ўдзельнікаў міжнароднароднага фестывалю і памятныя сувеніры.

Падчас прэс-канферэнцыі адбылася прэзентацыя музычных інструментаў краін-удзельнікаў фэсту. Госці расказалі прысутным аб мясцовых музычных інструментах, асаблівасцях іх вырабу і тонкасцях выканаўчага майстэрства.

Цудоўным падарункам удзельнікам прэс-канферэнцыі стала яшчэ адна  прэзентацыя. Мастак, ураджэнец Глыбоччыны Эдуард Мацюшонак прадставіў прысутным сваю работу -  мастацкую карціну “Абуджэнне”. На ёй праз народную сімволіку, гістарычныя вобразы і выяву дудара паказана мінулае Беларусі і глыбокія карані беларускай культуры. У хуткім часе, пад час Вішнёвага фестывалю, усе жадаючыя змогуць бліжэй пазнаёміцца з работай мастака. 

Цікава прайшла прэзентацыя кнігі “Дудары Глыбоцкага краю”, выхад якой быў прыўрочаны да трэццяга па ліку фестывалю. Кніга падрыхтавана Віталем Воранавым і з’яўляецца перавыданнем кнігі “Дударская Глыбоччына” з дапаўненнямі і змяненнямі.

Напрыканцы мерапрыемства прысутныя мелі магчымасць весці бяседу з гасцямі і арганізатарамі фестывалю.

 Замежныя госці ўбачылі ўнікальную выставу літаратуры "Дуда мая ты спеўная". На ёй прадстаўлены друкаваныя і электронныя носьбіты адпаведнай тэмы з васьмі краін Еўропы, Рассіі і Беларусі. Калекцыя папоўнілася двумя новымі выданнямі Харватскай Рэспублікі, якія са шчырасцю падараваў бібліятэцы аўтар Сцяпан Вечковіч.

Сярод каштоўных падарункаў і гравюра з выявамі музыкаў Сярэднявечча, у т.л. і  дудара. Гравюра набыта на аўкцыёне ў Францыі. Ахвярадаўцы - Марат Клакоцкі, Хрыстафор Жаляпаў, Ганна Шарко і Віталь Воранаў.  Шчырае дзякуй шаноўнаму спадарству за такі каштоўны падарунак! 

З цікавасцю замежнікі разглядалі і работы юных навучэнцаў мастацкай школы імя Я.Драздовіча.

В.Ц.Спасібёнак, дырэктар ЦБС. 11 мая 2019 г.