Выцінанка - традыцыйнае мастацтва выразання з паперы, шырока распаўсюджанае ў Беларусі.
Для звычайных беларусаў папера ў канцы XIX стагоддзя стала больш даступнай. У гэты час з'яўляецца ў побыце і ажурная, адмысловая выразка, якую ведаем як выцінанку. У залежнасці ад рэгіёна бытавалі розныя назвы: выразанка, выстрыганка, выбіванка. Карункамі з белай, чорнай і каляровай паперы гаспадыні аздаблялі вокны, сцены, паліцы, абразы, люстэркі, куфры. Напярэдадні навагодніх святаў па ўпрыгожаных вокнах у нашым горадзе лёгка заўважыць, хто займаецца выразаннем з паперы. Рэкамендуем гэтым аматарам больш складаныя задачы – узоры традыцыйных святочных выцінанак можаце знайсці ў прапанаваных кнігах у нашай бібліятэцы.