Сусветны дзень чытання ўслых адзначаецца ў першую сераду лютага і сёлета прайшоў 1 лютага. Гэты дзень, прысвечаны не толькі чытанню, але мастацтву і практыцы чытання ўслых. 

Вусныя формы аповеда былі самым першым  спосабам захавання чалавечых ведаў і  перадаваліся яны багатай і яскравай мовай, што спрыяла лепшаму іх запамінанню. Сусветны дзень чытання ўслых  дапамагае нам вярнуць гэтую традыцыю - выразна і красамоўна перадаваць інфармацыю адзін аднаму, прыгожа размаўляць і, адначасова,  папулярызаваць пісьменнасць. Вядома, што чытанне ўслых спрыяе развіццю прыгожай мовы, а гэта ў сваю чаргу  прываблівае суразмоўцаў, павялічве запас слоў,  развівае памяць і павышае граматнасць асобы.   

Супрацоўнікі Падсвільскай дзіцячай бібліятэкі правялі гэты дзень экспромтам і назвалі “Што люблю, тое і прачытаю”. Кожны наведвальнік бібліятэкі і ўдзельнік экспромта выбіраў сваю любімую кнігу і чытаў услых кароткі ўрывак з яе. Дзеці выбіралі кнігі не толькі на рускай мове, але і, што  вельмі прыемна!, на беларускай мове.

Мы яшчэ раз пераканаліся, што нашы чытачы не толькі самыя прыгожыя, але і самыя надзейныя сябры і аднадумцы!  Дзякуй вам, юныя падсвільчане!

Каляга А.І., заг. Падсвільскай дзіцячай бібліятэкі