14 красавіка спаўняецца 55 гадоў з дня нараджэння  дзіцячай пісьменніцы-казачніцы Алены Масла. Масла – яе сапраўднае прозвішча, пісьменніца  нават жартуе, што масла можна намазваць на батон, можна дадаваць у кашу, а зараз можна з маслам чытаць.

З нагоды  яе юбілею бібліятэкары Шунеўскай бібліятэкі запрасілі вучняў пачатковых класаў на кніжнае знаёмства “Мяне завуць Лахнэска”. Так называецца адна з казак пісьменніцы. Лахнэска – гэта маленькі дыназаўрык, што ўцёк з Лахнэскага возера, дзе з яго кпілі за нестандартную знешнасць. Казка нават надрукавана шрыфтам Брайля, бо лічыцца, што яна будзе цікава дзецям з асаблівасцямі развіцця.

Дзеці пазнаёміліся з пацуком Фэлікам, які пасля сваіх вандровак дадому вярнуўся з нявестай Ларыскай, з Данікам, які вандруе з божымі кароўкамі Ірыскай і Хлебным Мякішам, перамагае нядобрых людзей і ўчыняе подзвігі, як сапраўдны рыцар.

Алена Масла атрымала прэміі «Залаты Купідон», імя Васіля Віткі, творы яе ўключаны ў праграму школьнага і пазашкольнага чытання, кнігі неаднаразова прызнаваліся лепшымі паводле чытацкіх сімпатый. А мульцік «Лагодны воўк», зняты нацыянальнай кінастудыяй «Беларусьфільм» па яе казцы, стаў лепшай анімацыяй на кінафестывалі «Лістапад».

         Персанажы Алены Масла мілыя і арыгінальныя, па жыцці ідуць выключна сваёй дарогай, нікому не замінаюць, на першае месца ставяць узаемавыручку і дабрыню.
         Напрыканцы мерапрыемства бібліятэкар выказала думку,што лічыць, якімі б шпаркімі крокамі свет ні рухаўся да прагрэсу, тэхналогій і як бы ні запаланяў жыццё камп’ютар, старая добрая сяброўка казка не страціць актуальнасці ніколі. 

                                                                                    Заг.бібліятэкі  Нікіфаровіч І.Ф.