“Якія знаёмыя назвы і словы,

Якая цудоўная родная мова!

І ўсё мілагучна для слыху майго:

І звонкае “дзе”, і густое “чаго”…

Гэтыя словы Пімена Панчанкі былі ўзяты ў якасці эпіграфа да  мерапрыемства “З любоўю да роднага слова”, якое прайшло 23 лютага ў Глыбоцкай дзіцячай бібліятэцы. У гульні прынялі ўдзел 2 каманды вучняў 3”В” класа СШ №2 г.Глыбокае – “Валошка” і “Зубраня”. Асноўнай мэтай мерапрыемства было выхаванне ў дзяцей любові да роднай мовы, цікавасці да моўнага багацця беларускага народа.

      Дзеці прымалі ўдзел у конкурсах “Рассыпаныя прыказкі”, “Папацей, грамацей!” (пісалі  незвычайную камандную дыктоўку), “Перакладчыкі”, “На што падобна літара “ў” (конкурс малюнкаў), “Народная мудрасць” (трэба было адгадаць загадкі і падабраць сінонімы да адгадак). 

Для капітанаў каманд   быў праведзены конкурс “Лепшы гаварун”, у якім дзеці павінны былі хутка і правільна вымавіць скорагаворкі. Таксама ўдзельнікі мерапрыемства азнаёміліся з літаратурай, прадстаўленай на выставе “Родная мова – душа народа”.

       Гульня прайшла весела, займальна. На працягу ўсяго мерапрыемства вучні былі актыўныя, дух спаборніцтва і жаданне стаць лепшымі абвастрылі іх здольнасці, поўнасцю раскрыўшы, такім чынам, увесь іх творчы патэнцыял. Перамагла каманда “Валошка”. Скончылася мерапрыемства песняй “Беларусь мая сінявокая”, а таксама парадай вучням і кожнаму з нас: “Любіце, шануйце роднае слова!”

Бібліятэкар    А.А. Хахолка