23.09.20

Тэматычны семінар “Бібліятэка - цэнтр захавання народных традыцый” для  бібліятэкараў ДУК “Глыбоцкая ЦБС” прайшоў  на базе  Гатаўшчынскай сельскай бібліятэкі.   

Удзельнікі семінара пазнаёміліся з дзейнасцю бібліятэкі. Упрыгожвалі памяшканне выставы мясцовых умельцаў. Вызвала  вялікае ўражанне выстава вышываных абразоў "Да святыні душой дакраніся" Зінаіды Іосіфаўны Стахаевіч з в. Забор'е, прыцягнула ўвагу выстава калектыўных работ з бісеру ўдзельнікаў гуртка дэкаратыўна-прыкладнога мастацтва "Маленькія чараўнікі" і алмазная вышыўка  Піскуновіч Ксенія, вучаніцы 9 кл., в. Гатаўшчына. (кіраўнік гуртка Пацянкоўская В.Ф., загадчык Гатаўшчынскага СДК). Сям'я Таісіі Анатольеўны і Сяргея Леанідавіча Пацеевых  прадставіла вынікі свайго захаплення - выпальвання па дрэве і вышыўцы. 

Удзельнікі семінара з цікавасцю прагледзілі в/ф “Нематэрыяльная  культурная спадчына Глыбоччыны. Традыцыйная страва  “Клёцкі з душамі”, атрымалі метадычныя рэкамендацыі па тэме “Шпак - прыродны сімвал Глыбоцкага раёна”.  

Былі падведзены вынікі раённага бібліятэчнага агляду-конкурсу “Край мой родны – зямля Глыбоцкая”. Усяго было прадстаўлена 22 работы ў пяці намінацыях.

У намінацыі “Летапіс роднага краю” з 11 прадстаўленых работ лепшым прызнаны храналагічны летапіс  “Жыццё вёскі Бабічы і гаспадаркі “Залатая падкова” у датах і падзеях” Бабічоўскай бібліятэкі-клуба. Загадчык установы Сайкоўская Г.Ю.  паказала жыццё сваёй вёскі пачынаючы з ХУІІ стагоддзя і да нашых дзён.

Пяць работ удзельнічалі ў намінацыі “Падарожжа па роднаму краю”. Лепшымі прызнаны работы бібліятэкараў Гатаўшчынскай і Чарневіцкай бібліятэк.

У намінацыі “Культура ў асобах” былі падрыхтаваны тры работы. Адной з лепшых стала работа супрацоўнікаў Дзеркаўшчынскай бібліятэкі. Бібліятэкары сабралі багата інфармацыі пра Лупач Сцепаніду Аляксандраўну – носьбіта традыцыйнай тэхналогіі выпечкі жытняга хлеба, які увайшоў ў Дзяржаўны спіс гісторыка- культурных каштоўнасцей Рэспублікі Беларусь.

Шунеўская сельская і Падсвільская гарпасялковая бібліятэкі абралі намінацыю “Майстры-умельцы нашага краю”.

Пра 14 майстроў, іх выставы і сустрэчы ў культустанове, расказалі ў сваёй рабоце бібліятэкары Падсвільскай гарпасялковай бібліятэкі, таму і выйшлі пераможцамі. 

У намінацыі “Сямейная чытацкая дынастыя” загадчык Глыбоцкай дзіцячай бібліятэкі Андрыеўская Т.І. прадставіла  матэрыял пра 14 самых актыўных чытаючых сямей бібліятэкі.

Віншуем бібліятэкараў з перамогай у конкурсе! Поспехаў і творчасці вам у працы!

Загадчык аддзела бібліятэчнага маркетынгу ЦРБ Татачук А.М.

23.09.2020