У Дзень ведаў вучні 5-7 класаў завіталі ў Шунеўскую бібліятэку. Там іх чакала відэападарожжа па незвычайнай Беларусі, Беларусі музейнай!

Першым вучні наведалі Музей беларускага кнігадрукавання ў Полацку. Затым пазнаёміліся з незвычайнымі мінскімі музеямі:  Музеем Ката′, Музеем архітэктурных мініяцюр «Краіна міні», Музей грошаў Groshi, інтэрактыўны Музей дзяцінства.

Па-за межамі сталіцы наведалі музейныя комплексы “Лінія Сталіна” (stalin-line.museum.by), “Дудуткі” (https://dudutki.by/)  і Музей валуноў (https://belvisit.com/muzej-valunov-v-minske.html ). Відэапарожжа закончылі ў сценах у Гродна ў самай даўняй аптэцы-музеі  (https://www.am.biotest.by/ ). 

Падарожжа па Беларусі суправаджалася праглядам відэафільма пра замкі Беларусі і легенды, звязаныя з імі.

Апошнім часам гарады і тэрыторыі прадпрыемстваў аздабляюць цікавымі помнікамі і скульптурнымі кампазіцыямі. Дзеці ахвотна ўзгадалі глыбоцкія помнікі - “Глыбоцкую вішню”, кампазіцыю “Сям’я”, “Дзеда глыбачаніна”, “Іісуса і самаранку” і, вядома ж, “Барона Мюнхаузена”.

Бібліятэкар пазнаёміла дзяцей з незвычайнымі помнікамі нашай краіны:  Рагачоўскай згушчонцы, яйку на тэрыторыі Салігорскай птушкафабрыкі, бабру ў Бабруйску, агурку ў Шклове, астролагу ў Магілёве, літары “Ў” у Полацку і інш., аб якіх дзеці  нават не ведалі.

Крыжаванка і віктарына “Наш край” замацавалі веды, атрыманыя падчас відэападарожжа. 

Кнігі, прадстаўленыя на выставе “Гэта ўсё Беларусь мая мілая”, сталі добрым  дапаўненнем да відэападарожжа. Бібліятэкар звярнула ўвагу дзяцей на кнігу Л.С. Мінкевіча “Самые необычные музеи Беларуси”, дзе  расказваецца пра музей шакаладу ў Віцебску і антыалкагольны музей у вёсцы Мосар пры касцёле св. Ганны; кнігу М. Ткачова “Замкі Беларусі” якая падрабязна знаёміць з архітэктурай, гісторыяй і легендамі пра замкі і абарончыя збудаванні Беларусі; кнігу С. Дзявяткавай “Самыя незвычайныя помнікі”, якая дапоўніла відэапрэзентацыю цікавымі звесткамі пра металічнага шасціпавярховага зубра на мяжы Брэсцкай і Мінскай абласцей.

Бібліятэкары пажадалі вучням поспехаў у вучобе і падарылі школьнікам постэры для запісаў раскладу ўрокаў з рэкламай дзіцячых часопісаў, якія выпісвае Шунеўская бібліятэка.

2 верасня 2020 года                   заг. бібліятэкі   І.Ф. Нікіфаровіч