З пачатку сакавіка наведвальнікі Дзеркаўшчынскай сельскай бібліятэкі могуць пазнаёміцца з выставай “Невычэрпная крыніца фантазіі і прыгожых узораў”. Выстава не кніжная, а творчая! На ёй прадстаўлены вышываныя работы Ганны Рыгораўны Табола.

Кожны выраб – сапраўдны шэдэўр. Гладдзю, крыжыкам вышывае тое, што бачыць вакол сябе –  птушак, жывёл, кветкі і розныя арнаменты на ручніках. Калі глядзіш на вырабы Ганны Грыгор’еўны, нельга не захапляцца іх прыгажосцю, майстэрствам выканання.

Ганна Рыгораўна нарадзілася ў мястэчку Заастравечча Клецкага раёна Мінскай вобласці.  Вышыўкай захаплялася з дзяцінства. У 1983 годзе з сям’ёй пераехала ў Дзеркаўшчыну,  дзе пражывае і зараз. На новым месцы,  акрамя працы,  яна стараецца знайсці час і для любімай справы. У вольны час вышывае, вяжа пруткамі і кручком. Такое майстэрства – назаўжды!

Адбелены расой
Ручнік – жыцця аздоба.
На ім не раз хлеб-соль
Сустрэнуць часам добрым.

Кранецца струн смычок,
Вяселле ўзрушыць хату, –
На грудзі праз плячо
Ручнік павяжуць свату.

У новы ўвойдуць дом,
Каб там пражыць да скону,
Як продкі, ручніком
Акутаюць ікону.

Хто сэрцам не маўчыць, –
З мінуўшчынай гаворыць, –
Раскажуць шмат аб чым
На ручніку узоры... 

                                Станіслаў Валодзька "Ручнік"

Загадчык Дзеркаўшчынскай сельскай бібліятэкі Бука В.В.