22.10.2021

У Падсвільскай гарпасялковай бібліятэцы адкрылася выстава маляванак “Кветкі райскага саду”.

Маляванка – жанр народнай творчасці, які ў першай палове мінулага стагоддзя быў распаўсюджаны на Заходняй Віцебшчыне.

Класікам маляванкі прызнаны ўраджэнец Глыбоччыны Язэп Драздовіч. Язэп Нарцызавіч быў не толькі таленавітым мастаком і скульптарам, але і пісьменнікам, паэтам, настаўнікам, этнографам, фалькларыстам, філосафам, хірамантам, археолагам, тэатральным дзеячам, астраномам-аматарам і, нават, заснавальнікам беларускай тэарэтычнай астраноміі. 

Важкі ўклад унёс мастак у развіццё народнай творчасці – стварыў дзясяткі насценных “дываноў-маляванак”, якія былі аздабленнем вясковых хат і адначасова выступалі ў якасці своеасаблівых абярэгаў. Захоўваючы традыцыю, Драздовіч заўсёды дадаваў ў гэты від народнага мастацтва нешта сваё, блізкае яму па духу, адметнае і непаўторнае, нават пачаў называць сам сябе “народна-сялянскім мастаком”. Хутка яго папулярнасць як майстра маляваных дываноў значна пашырылася. Амаль кожная гаспадыня хацела мець у сваёй хаце дыванок дзядзькі Язэпа.

Усплёск у адраджэнні народнага роспісу назіраўся ў 1970 – 80-х гадах, а сёння маляваныя дываны Віцебскага Паазер’я маюць статус гісторыка-культурнай каштоўнасці Беларусі.

Шмат  у Язэпа Драздовіча паслядоўнікаў, на Глыбоччыне гэта Галіна Таляронак і Святлана Скавырка. Маляваныя дываны Галіны Таляронак і Святланы Скавырка вобразна і яскрава адлюстроўваюць светаўспрыманне і жыццялюбасць беларускага народа.

На прапануемай выставе можна не толькі ўбачыць маляванкі, але нават паспрабаваць стварыць уласную маляванку. Вялікі поспех мае майстар-клас па самай лёгкай тэхніцы роспісу маляванак – штампа, які пастаянна праводзіцца ў Падсвільскай бібліятэцы.

Выстава будзе дзейнічаць да 20 лістапада 2021 г. Паспяшайцеся сустрэцца з прыгажосцю!

Яцкоўская С.П., заг. Падсвільскай гарпасялковай бібліятэкі