Глыбоччына – край знакамітых людзей, сярод якіх - грамадскія дзеячы, вучоныя, веннаначальнікі, спартсмены, мастакі, літаратары.  Адны жылі і працавалі на пачатку ХХ стагоддзя, іншыя – нашы сучаснікі.

Імя прафесара Мікалая Іванавіча Савіцкага вядома тым, хто быў студэнтам Беларускага дзяржаўнага эканамічнага ўніверсітэта. Хто на пачатку 90-х гадоў ХХ стагоддзя, далучыўся да працэсу нацыянальнага адраджэння. Хто працаваў над упарадкаваннем навуковай і тэхнічнай беларускамоўнай тэрміналогіі.

Працоўная біяграфія Мікалая Іванавіча Савіцкага звязана з Беларускім дзяржаўным эканамічным універсітэтам, вядомым сярод студэнтаў як “нархоз”. Ва ўніверсітэт  М.І. Савіцкі прыйшоў у1964 г. пасля заканчэння аспірантуры ў Маскве, дзе абараніў кандыдацкую дысертацыю па машыннай апрацоўцы эканамічнай інфармацыі. Праца была  першай ў Беларусі, зацверджанай ВАК СССР у гэтай галіне.

У 1982 г. М.І.Савіцкі  атрымаў званне прафесара кафедры “Вылічальныя машыны і праграмаванне на ЭВМ”, якой ён загадваў амаль 20 год (з 1988 г. – кафедра “Інфарматыкі і вылічальнай тэхнікі”). Мікола Савіцкі надрукаваў больш як 100 навуковых прац, а таксама шэраг публіцыстычных артыкулаў па пытаннях адраджэння беларускай мовы і культуры.

Пасля абвяшчэння незалежнасці Рэспулікі Беларусь у 1991 годзе і прыняцця Закона аб мовах М.І.Савіцкі стаў адным з першых сярод  прафесарска-выкладчыцкага складу РБ, хто зразумеў важнасць распрацоўкі беларускамоўнай навуковай тэрміналогіі па інфарматыцы і вылічальнай тэхніцы і зрабіў у гэтым  кірунку неацэнны ўклад. У 1992 г. выходзіць унікальны па задуме трохмоўны “Руска-беларуска-англійскі слоўнік па  інфарматыцы і вылічальнай тэхніцы”. Следам выходзяць грунтоўныя вучэбныя дапаможнікі і падручнікі па зусім новых і  запатрабаваных дысцыплінах, што склаліся ў галіне інфармацыйных тэхналогій: “Эканамічная інфарматыка і вылічальная тэхніка” (1996), ”Тэхналогіі арганізацыі, захоўвання і апрацоўкі звестак” (2000).

Яшчэ ў 1990 годзе прафесар Мікола Савіцкі пераходзіць да выкладання ўсіх навучальных прадметаў па інфарматыцы на беларускай мове і застаецца верным свайму выбару да канца. Ягоны прыклад ў 90-я гады ХХ стагоддзя перанялі многія выкладчыкі самых розных галінаў ведаў.

Пасля выхаду на пенсію ў 2001 г. Мікалай Іванавіч не спыпыняе творчай працы над вучэбна-метадычнай літаратурай. 

“Тлумачальны слоўнік па інфарматыцы” прафесара М.І. Савіцкага – вынік шматгадовых творчых пошукаў і руплівай працы на ніве фармавання беларускамоўнага мыслення ў навуцы і адукацыі. Слоўнік абагульняе вопыт дванаццацігадовага выкладання на беларускай мове розных дысцыплін па інфарматыцы ў БДЭУ, а таксама працы ў тэрміналагічнай камісіі пры Таварыстве беларускай мовы імя Францыска Скарыны.

Аўтар дае тлумачэнне больш як 2500 тэрмінам, што найбольш часта ўжываюцца ў галіне інфармацыйных тэхналогій, інфарматыцы, вылічальнай тэхніцы і кіраванні.

Дарэчы, слоўнік выдадзены за ўласныя сродкі аўтара-пенсіянера. Нам прыемна, што ў фондзе Глыбоцкай раённай бібліятэкі маецца дадзенае выданне з уласным надпісам аўтара. 

     4 лютага  спаўняецца 85 год з дня нараджэння САВІЦКАГА Міколая Іванавіча. Нарадзіўся ён  у в. Паўлаўшчына, Празароцкага сельсавета Глыбоцкага раёна. Пражывае ў г. Мінску.