Літаратурная паліца Глыбоччыны папоўнілася новым выданнем – празаічным зборнікам “Журавінавае варэнне” Валянціны Субач, альбо Марговіч Валянціны Мікалаеўны. Гэта ўжо другі зборнік твораў Валянціны Мікалаеўны. Першай стала кніжачка паэзіі "Весенние ливни".
Прэзентацыя новага выдання адбылася ў Запрудским доме фальклору, сярод аматараў кнігі і чытання, сяброў, знаёмых і родных людзей.
Валянціна Мікалаеўна, ураджэнка в. Ластавічы, выпускніца Кіраўскай СШ, Дзяржаўнага інстытута народнай гаспадаркі, адпрацавала па размеркаванні і вярнулася на Глыбоччыну. Усё працоўнае жыццё была на пасадзе эканаміста ў гаспадарках раёна. Але выхад на пенсію прымусіў задумацца аб далейшых планах – здароўе паправіць, гаспадаркай заняцца, хобі знайсці?..
Валянціна Мікалаеўна вырашыла аддацца ўспамінам і занатаваць іх на паперы: “… каб унукі і праўнукі ведалі, як жылі вяскоўцы ў 60-х гадах ХХ стагоддзя”. Успаміны выліліся ў добрую кніжку, пра якую аўтар кажа: “Гэта ўспаміны пра маё басаногае дзяцінства … якраз тыя моманты, калі неба сіняе, трава зялёная, а летні сонечны дзень, здаецца, цягнецца бясконца…”
Зборнік каштоўны тым, што распавядае аб вяскоўцах, – родных, суседзях, знаёмых, – якія пражылі жыццё ў шчасці і горы, багацці і нястачы, слязах і гумары…
Напісаныя выразнай сакавітай беларускай мовай, апавяданні інтрыгуюць завязкай і развязкай, часам такімі закруцістымі сюжэтамі, што не ў кожным рамане такое прачытаеш!
Цікавяць тапанімікай: Русацкі лес, Лаўрынаўская гара, Петухова прыстань, Сымонава кладка.
Абуджаюць апетыт вясковымі стравамі: перапечкі, раўгеня, путра, хлеб на дубовых лісцях.
Здзіўляюць незвычайнымі імёнамі: Яфім, Вінцэнт, Нічыпар, Ларыён. Альжбета і Александрына, Фядора і Васіліна, Салманіда!, Анэля!, Адэльфіна!.. Дзе вы зараз сустрэніце такія каларытныя беларускія імёны?!
У зборніку ёсць і філасофскія апавяданні, і гумарыстычныя падзеі вясковага жыцця.
У літаратурны шлях направіў аднакласніцу журналіст і драматург Уладзімір Сауліч. Менавіта ён упэўніў Валянціну Мікалаеўну ў яе літаратурных здольнасцях, добрым гумары і параіў пісаць прозу. На сустрэчы Уладзімір Уладзіміравіч павіншаваў сяброўку з выхадам зборніка.
Словы віншаванняў выказалі дачка Надзея Мікалаеўна Германовіч і ўнучка Крысціна. Прыемным сюрпрызам для Валянціны Мікалаеўны стала сустрэча са сваёй колішняй настаўніцай Ларысай Дзмітрыеўнай Недбайла. Добрыя словы аўтару гаварылі сяброўкі Тамара Сяргееўна Матвеева і Ірына Віктараўна Кажэка.
Прысутным быў прадстаўлены музычны відэакліп ”Звенел хрусталь” (словы Валянціны Марговіч, музыка Ганны Шакола..)
Спявачка Валянціна Пятроўская коратка прэзентавала гледачам свой песенны зборнік "Пяю табе, мой краю родны..." і выканала аўтарскія песні "Беларусь - мая песня и казка!", “Глыбокае – вішнёвая сталіца” , “Расскажи мне гармошка” і інш.
Мерапрыемства атрымалася добрым, светлым і радасным! Усім было вельмі прыемна, што да славутых імён Залесчыны – Янка Пачопка, Фама Ляшонак, Рыгор Шарыпкін дабавілася яшчэ адно слаўнае імя нашай зямлячкі – Валянціна Субач!
У арганізацыі мерапрыемства вялікую дапамогу аказалі Б.І.Заяц, старшыня Залескага сельсавета, супрацоўнікі Запрудскага дома фальклору – загадчык А.В.Жалткевіч, акампаніятар Д.Л. Крывёнак.
Г. Гаравая, бібліятэкар Запрудскай сельскай бібліятэкі
