Супрацоўнікі бібліятэкі ў займальнай форме пазнаёмілі дзяцей з асноўнымі прававымі дакументамі Рэспублікі Беларусь і навучылі карыстацца слоўнікамі і даведнікамі. 

19 лістапада ў Падсвільскай гарпасялковай дзіцячай бібліятэцы прайшоў турнір знаўцаў “Ведай свае правы” , прымеркаваны да Сусветнага дня дзіцяці.    

Супрацоўнікі бібліятэкі ў займальнай форме пазнаёмілі дзяцей з асноўнымі прававымі дакументамі: Канстытуцыяй Рэспублікі Беларусь, Усеагульнай дэкларацыяй правоў чалавека, Дэкларацыяй правоў дзіцяці, Канвенцыяй аб правах дзіцяці.

Узгадваючы казкі "Залаты ключык або прыгоды Бураціна", "Чырвоная шапачка", "Папялушка", "Шэрая шыйка" дзеці разважалі, ці заўсёды выконваюцца правы герояў, вызначалі, дзе крыўдзяць казачных герояў, значыць там парушаюць іх правы, а дзе героі вясёлыя, шчаслівыя,то іх правы выконваюцца. Актыўна дзеці адказвалі на пытанні ў заданні "Абавязкі".

Напрыканцы сустрэчы хлопчыкі і дзяўчынкі зрабілі выснову, што кожны павінен адказваць за свае словы і ўчынкі. Чытачоў папрасілі ведаць не толькі свае правы, але і адказна ставіцца да сваіх абавязкаў: выконваць Канстытуцыю Рэспублікі Беларусь, паважаць дзяржаўныя сімвалы краіны, клапаціцца аб захаванасці гістарычнай і культурнай спадчыны.

22 лістапада — Дзень слоўнікаў і энцыклапедый, а бібліятэка — месца, дзе прадстаўлена мноства разнастайных слоўнікаў, даведнікаў і энцыклапедый, якія дапамагаюць папоўніць слоўнікавы запас, знайсці адказы на розныя пытанні, атрымаць тлумачэнні тэрмінаў і паняццяў.

Да гэтага дня супрацоўнікі Падсвільскай гарпасялковай дзіцячай бібліятэкі арганізавалі і правялі ўрок-практыкум “Сто вопросов  в голове, а ответы  в словаре”. 

Бібліятэкар пазнаёміла наведвальнікаў бібліятэкі з разнавіднасцямі слоўнікаў і энцыклапедый і магчымасцямі іх выкарыстання. Падчас урока дзеці даведаліся, што азначае слова “слоўнік” і хто першым яго вынайшаў. Пазнаёміліся з асобай Уладзіміра Даля і яго ўнёскам у вывучэнне і развіццё рускай мовы.

Далей, у ходзе практычнай часткі урока, дзеці выконвалі граматычныя заданні: устаўлялі літары ў прапушчаныя словы, расстаўлялі націскі ў словах, перакладалі словы з адной мовы на іншую. І ўсё не без дапамогі слоўнікаў! Тым самым упэўніліся ў неабходнасці слоўнікаў для граматнасці чалавека.

Загадчык Падсвільскай гарпасялковай дзіцячай бібліятэкі А. І. Каляга