Шакола Ганна

Шакола Ганна Казіміраўна.

Shakolo Anna 1 Нарадзілася 20 кастрычніка 1957 года ў в. Мышкі Пастаўскага раёна Віцебскай вобласці. Дзявочае прозвішча – Мышко. Скончыла Варапаеўскую сярэднюю і музычную школы. У 1974 г. паступіла ў Мінскі дзяржаўны педагагічны інстытут імя А.М. Горкага на спецыяльнасць “Музыка і спевы”. Пасля яго заканчэння працавала выкладчыкам па класу вакалу і фартэпіяна ў Полацкім педвучылішчы (1979 – 1981 гг.).

Пасля замужжа пераехала жыць у Грузію. Назначана настаўніцай спеваў у СШ № 2 г. Ахалцыне Грузінскай ССР. У 1982 г. Г. Шакола прынята на пасаду кіраўніка харавога калектыву Дома афіцэраў Ахалцыхскага гарнізона, затым пераведзена на пасаду кіраўніка мастацкай самадзейнасці. У сувязі з пераводам мужа на новае месца службы, пераехала ў пасёлак Вазіані Грузінскай ССР, дзе працавала мастацкім кіраўніком Вазіанскай сярэдняй школы.

Shakolo Anna 2 У 1988 г. Г.К. Шакола з дачкой Юлей пераехала жыць у Глыбокае. Працавала спачатку загадчыкам перасоўнага аўтаклуба, затым дырэктарам Глыбоцкага РДК (1989-1996). З 1997 г. -- выкладчык музыкі ў СШ № 3 і раённай гімназіі.

Пачала пісаць музыку ў пачатку 2000-х гг.

У зборніку песень “Глыбоцкі вальс” апублікаваны вершы паэта Віталя Гарановіча на музыку Ганны Шаколы (“Глыбоцкае танга”, “Наш горад”, “Азёры” і інш.) Некаторыя з песен уключаны таксама ў зборнік “У Будслаўскай святыні ты ранішняй зоркай”.

Супрацоўнічае ў творчым плане з іншымі мясцовымі паэтамі (Ганна Зінкевіч, Міхаіл Осіпаў, Зоя Наваенка і інш.).

Shakolo Anna 3 Shakolo Anna 4

Г. Шакола – аўтар музыкі да гімну валанцёраў Беларускага таварыства Чырвонага Крыжа, гімну раённай арганізацыі ГА “БРСМ”, гімну Віцебскай абласной арганізацыі Беларускага прафсаюза работнікаў адукацыі і навукі; яна пераможца абласнога конкурсу кампазітараў Віцебшчыны, прысвечанага 60-годдзю вызвалення Беларусі ад нямецка-фашысцкіх захопнікаў, лаўрэат IV Усебеларускага фестывалю нацыянальных культур у Гродне.

Выступала салісткай у народным камерным хоры пад кіраўніцтвам Д. Волкавай, удзельніца касцёльнага хору “Ave Maria”, з’яўляецца кіраўніком ансамбля польскай песні “Глыбачане”, уключана ў калектыўнае аўтарства альманаха “Пралеска сіняй Беларусі” і зборніка “Вітай ў Будславе, Марыя!”.

У 2004 г. супрацоўнікі раённай бібліятэкі арганізавалі першы творчы вечар самадзейнага кампазітара “Музыка маёй душы”. У 2008 г. у раённай гімназіі прайшоў другі творчы вечар “Калядныя сустрэчы”. У 2011 г. у рамках святкавання Дня незалежнасці на Цэнтральнай плошчы адбыўся сольны канцэрт Ганны Казіміраўны “Табе, маё Глыбокае!” у 2016 годзе ў рамках "Вішнёвага фестываля" адбылася творчая вечарына Ганны Шаколаю.

У 1995 г. Г.К.Шакола абіралася дэпутатам раённага Савета народных дэпутатаў.

Shakolo Anna 5 Узнагароджана Ганаровай граматай Глыбоцкага раённага Савета дэпутатаў (1995), Граматай Глыбоцкага раённага выканаўчага камітэта (2011); мае шмат грамат ад Глыбоцкай раённай ГА БСРМ, Глыбоцкага аддзела культуры, Глыбоцкага аддзела адукацыі, Глыбоцкага аддзела па справах моладзі, падзякі ад кіраўніцтва Глыбоцкай раённай гімназіі, цэнтра пазашкольнай работы і іншых арганізацый і ўстаноў.