19 кастрычніка ў файе Глыбоцкай цэнтральнай раённай бібліятэкі прайшло адкрыццё выставы карцін Алены Кабылінскай “Озарение”. Алена родам з вёскі Ласіца, што ў Пастаўскім раёне, але школьныя гады яе праходзілі ў Глыбокім. Вучылася ў СШ №1, займалася ў музычнай школе па класе фартэпіяна, наведвала гурток ткацтва габеленаў. Але змалку выношвала мару: узяць у рукі пэндзаль і пераносіць на мальберт прыгажосць родных краявідаў і пачуцці, якімі перапоўнена душа.
Пасля школы паступіла ў Мінскі фінансава-эканамічны тэхнікум, затым факультэт падаткаў і падаткаабкладання Беларускага дзяржаўнага эканамічнага ўніверсітэта. Працуе дзяржаўным падаткавым інспектарам ІМПЗ па Глыбоцкім раёне.
У 2018 годзе намалявала сваю першую карціну - пейзаж. Малюе партрэты, нацюрморты, прыродныя пейзажы, храмы. Пакуль што шукае сябе, як мастака, свой стыль і жанр. Падабаецца працаваць ў накірунку гіперрэалізму. Як кажа Алена, кожная новая карціна акрыляе, надае сіл і яна з нецярплівасцю чакае, калі выдасца вольная хвілінка, каб заняцца любімай справай. Марыць арганізаваць выставу карцін пра родны горад Глыбокае.
Алена Міхайлаўна прадставіла 28 карцін рознай тэматыкі. Кожная - яркая, асаблівая, непаўторная. Кветкі - захаплялі, пейзажы - зачароўвалі, партрэты - прыцягвалі ўвагу.
Павіншаваць Алену з персанальнай выставай, а гэта ўжо другая яе выстава, прыйшлі родныя, сябры, калегі. Шмат пажаданняў і кветак атрымала госця падча сустрэчы.
