Адбылася чарговая сустрэча ўдзельніц жаночага клуба “Сяброўкі”.
Сустрэліся сяброўкі дзеля 
вандроўкі “Падсвілле – край азёрны”. Актыўныя і спартыўныя, скандынаўскай хадой яны прайшліся па беразе возера Алаізберг. Папутна ўзгадалі цікавую гісторыю пра назвы, якія мела возера ў розныя часы. Завяршылася вандроўка ігрой у дартс.
Гарадскі пасёлак Падсвілле раскінуўся на маляўнічым беразе возера Алаізберг. Вядома, што возера раней мела некалькі назваў: Красоцкае або Красавецкае, Жывіца, Люзбэрак, Лязбэрак і Алаізберг.
Мяркуем, што назву Красоцкае або Красавецкае возера атрымала за тое, што яно было настолькі чыстым, прыгожым, што людзі, калі бачылі возера, с захапленнем усклікалі: “Якая краса!” Таму і называлі яно Красоцкім.
Сталыя жыхары Падсвілля захавалі ў сваёй памяці назву возера – Жывіца, што азначала жывое, чыстае, як кроплі сасновай смалы – жывіцы.
Назву Люзбэрак возера атрымала, магчыма, ад вобразнага выказвання – люстраны бераг, ад люстраной гладзі вады. Існуе яшчэ адно меркаванне, у перакладзе з польскай мовы “Las” – лес, атрымліваецца - лясны бераг.
Назва Алаізберг нямецкага паходжання. Па сведчанню былой настаўніцы геаграфіі Падсвільскай СШ Крупскай Лідзіі Лукінічны, на беразе возера, непадалёк ад былога ільнозавода, месціўся фальварак. Гаспадар фальварка, немец па паходжанню, меў прозвішча Алаізберг. Яму належыла і возера, якое па прозвішчу гаспадара сталі пазней называць.
Адметна наша возера і тым, што розныя куткі яго таксама маюць свае мянушкі. Напрыклад, Бацяноўка, Сырапятка. Жыхары мястэчка заўважылі, што на адным беразе збіраюцца бацяны, бо знаходзяць сабе ежу. Адсюль і назва – Бацяноўка. А назва Сырапятка гаворыць сама за сябе – бераг сыры, балоцісты. Аступіўся, ногі замачыў, сырая пятка стала!.. )))
Вось так, пазнавальна і карысна, прайшла краязнаўчая вандроўка сябровак.
Н.Аўласевіч, бібліятэкар Падсвільскай гарпасялковай бібліятэкі.
16/06/2021/
