«Мальчишки и девчонки, а также их родители…» пад такой назвай прайшоў бібліятэчны гульнядром у Шунеўскай бібліятэцы, прысвечаны Дню сям’і.
Удзельнічалі ў гэтым мерапрыемстве чатыры сям’і- Аксяновіч,Заблоцкіх,Бялянка і Хрол. У сяброўскай атмасферы, за кубачкам гарбаты бацькі і дзеці дзяліліся сваімі сямейнымі сакрэтамі, спявалі песні пра сям’ю, прымалі ўдзел у конкурсах. За правільныя адказы кожная сям’я атрымлівала бонус – цукерку.
Пачалася сустрэча з расказаў пра сямейныя традыцыі, пра свае захапленні. Так, цікава было даведацца, што сярод прысутных ёсць і аматары рыбачыць усёй сям’ёй, аматары веласіпедных прагулак, ёсць тыя, хто захапляецца настольнымі гульнямі, ладзіць паездкі ў кіно і на розныя раённыя святы ….
Удзельнікі мерапрыемства змагаліся ў складанні прыказак і прымавак пра сям’ю, выконвалі хатнія заданні па рускай мове, музыцы і матэматыцы. Цікава прайшоў конкурс “Ці ведаю я сваё дзіця?”. Пытанні былі адрасаваны бацькам, а іх адказы звяраліся з адказамі дзяцей.
Вясёлыя хвілінкі падарылі сем’і, расказаўшы гумарыстычныя выпадкі са свайго жыцця.
Удзел у кулінарным конкурсе не выклікаў цяжкасцей ні ў дзяцей, ні ў бацькоў. Усе паспяхова з ім справіліся. Выклікалі добрыя ўсмешкі гумарыстычныя загадкі бліц-размінкі.
Будавалі і “Дом сваіх мар”. Кожны пад дахам свайго дома пажадаў бачыць мір, спакой, дастатак, любоў і згоду.
Завяршылася свята цэрымоніяй узнагароджання. Дарослыя атрымалі медаль “За актыўны ўдзел”, а дзеці - “За старанне”. Самым актыўным дасталося больш салодкіх бонусаў.
Сям’я – самае галоўнае ў жыцці кожнага з нас. Сям’я – гэта блізкія і родныя людзі, тыя, каго мы любім, з каго бяром прыклад, аб кім клапоцімся, каму жадаем дабра і шчасця. Мерапрыемства дапамагло яшчэ больш аб’яднаць дзяцей і бацькоў, зрабіць крокі да ўзаемаразумення і адзінства, зразумець, што толькі разам, толькі праз давер і павагу можна быць лепшымі, дабівацца поспехаў, перамагаць.
22 мая 2019 г. Заг.бібліятэкі Нікіфаровіч І.Ф.
