Бібліятэчны дэсант “Кнігі з дастаўкай на дом” наведаў жыхароў вёскі Крывічы Зябкаўскага сельсавета. Галоўная мэта дэсанта – далучыць вяскоўцаў да грамадскага і культурнага жыцця сельсавета, раёна і краіны.  

Бібліятэкар Прошкаўскай сельскай бібліятэкі не толькі дастаўляе кнігі на дом чытачам, але і вядзе аветніцкую  дзейнасць. Падчас гутаркі з вяскоўцамі, бібліятэкар у рамках тэматыкі сёлетняга года –  Года жанчыны, акцэнтавала ўвагу на  беларускіх жанчынах, выдатных асобах розных  эпох.
Яна прывяла цікавыя факты пра жанчын, жыццё і дзейнасць якіх звязана з беларускай зямлёй: Е.Полацкую, Ф.Радзівіл, М.Осіпаву, З.Партнову, В.Харужую, С.Станюта, К.Буйло, А.Пашкевіч, М.Васілеўскую, Н.І.Качанаву, В.А.Шпілеўскую.

Матэрыял пра вядомых беларусак прадстаўлены ў бібліятэцы на выставе “Великие женщины великой страны”.

Суразмоўцы, бібліятэкар і жыхары вёскі – Наумёнак Іван Пятровіч, Наумёнак Зінаіда Іванаўна, Сухавіла Вера Аляксандраўна і Сухавіла Ірына Аляксандраўна зрабілі выснову, што сіла беларускай жанчыны – у яе духоўнай трываласці, у здольнасці быць асветніцай і таленавітай паэткай, актрысай і касманаўтам, гераіняй і ўмелым кіраўніком. На жаночых плячах трымаецца Зямля, Дзяржава і Сям’я.

Бібліятэкар прапанавала чытачам новыя кнігі, у тым ліку беларускіх пісьменніц: Н.Голубевай, К.Хадасевіч-Лісавай, В.Маслюковай, А.Кузняцовай, Н.Сухінінай; В.Кунцэвіча, У.Гаўрыловіча, С.Клімковіча, А.Іванова. Кнігі знайшлі сваіх чытачоў!

У свой бок бібліятэкар атрымала запыт на падборку кніг пра святых нябесных заступніц  Беларусі, які будзе задаволены пры наступным наведванні вёскі.

 Вашыла Л.А., бібліятэкар Прошкаўскай сельскай бібліятэкі