Да Міжнароднага дня роднай мовы ў Глыбоцкай дзіцячай бібліятэцы была падрыхтавана выстава-знаёмства     “Дзень добры, кніжка беларуская!” з наступнымі раздзеламі: “Жывая спадчына”, “Вясёлыя дзівосы” і “Беларускі кнігазбор”. На выставе змяшчаліся выказванні вядомых людзей пра беларускую мову. Таксама была прадстаўлена інфармацыя “Мова ў лічбах і фактах”, якая змяшчала цікавыя звесткі, напрыклад, што 5 млн. 58 тысяч грамадзян назвалі беларускую мову роднай (гэта больш за 60% насельніцтва), па-беларуску размаўляюць 26% беларусаў і, што   ў Беларусі 40% беларускамоўных школ і інш.

Каля выставы  весела праходзіла моўнае лато “Багата ты, роднае слова”. Удзельнікі гульні па малюнку адзначалі, што гэта за рэч і давалі яе правільную назву на рускай і беларускай мовах.

У гучным  чытанні “Вось вам казкі – чытайце, калі ласка”     удзельнічалі і дзеці малодшага, і старэйшага школьнага ўзросту. Ім прапанавалася выбраць беларускую казку на свой густ. Больш за ўсіх маленькія чытачы выбіралі казку “Як курачка пеўніка ратавала”.

У акцыі “На роднай мове гавару” з задавальненнем удзельнічалі і дзеці, і дарослыя.

Наведвальнікі бібліятэкі, якія прынялі ўдзел ў акцыі, былі ўзнагароджаны эмблемай “Мова родная – мова модная!” і мы ўпэўнены, што ўсе прысутныя атрымалі добры настрой на ўвесь дзень.

Загадчык бібліятэкі Андрыеўская Т.І.