21 красавіка  ў Шунеўскай сельскай   бібліятэцы  для вучняў 9 класа прайшла слайд-прэзентацыя “Як сімвал славы абеліскі стаяць над мірнай сінявой”.

       У розных кутках Беларусі створаны сімвалічныя мемарыяльныя комплексы, устаноўлены манументы, прысвечаныя падзеям самай трагічнай і кровапралітнай вайны на гэтай шматпакутнай зямлі.   Сёння ў краіне каля 9 тысяч помнікаў і пахаванняў Вялікай Айчыннай вайны. Яны ўваходзяць у ваенна-гістарычныя маршруты і экскурсіі, але галоўнае – з'яўляюцца святым месцам ушанавання загінулых, вечным напамінам аб тым, які бясцэнны мір...

Восем помнікаў у горадзе Глыбокае і дзясяткі ў яго ваколіцах нагадваюць аб Вялікай Айчыннай вайне.

Бяссмертныя іх помнікі крані ты —
І цеплыню адчуеш пад рукой:
Іх высеклі не з камняў, не з граніту —
3 людской любві, з удзячнасці людской.

Падчас мерапрыемства бібліятэкар расказала пра  урочышча “Барок” у Глыбокім, манумент  Перамогі ў Мінску, пра мемарыальны комплекс у гонар савецкіх воінаў-вызваліцелей, партызан  і падпольшчыкаў у Віцебску, пра легендарную “Кацюшу” у Оршы, “Прарыў” ва Ушачах.

Вялікае ўражанне аказаў на ўдзельнікаў мерапрыемства аповяд  пра   7 мемарыялаў Беларусі ,устаноўленных на месцы спаленых вёсак Хатынь, Дальва,Шунеўка,Усакіна,Дрэмлева,Літавец,Боркі…

Відэафільм пра мемарыяльны комплекс “Чырвоны бераг”, прысвечаны дзецям-ахвярам вайны, паказаў якой цаной заваявана наша мірнае жыццё, колькі ахвяр забрала вайна, сярод якіх нават самыя юныя жыцці.

Дапаўненнем да мерапрыемства стала выстава “Вайна – самы страшны грэх”. На ёй прадстаўлена літаратура як дакументальнага характару, так і мастацкія творы. Зацікавілі кнігі з серыі “Дзеці вайны”, якія з’яўляюцца навінкамі ў бібліятэцы,а  кніга М. Чаргінца “Аперацыя “Кроў” дапоўніла відэафільм пра дзіцячыя лагеры смерці.

Заключным акордам мерапрыемства сталі словы: “Мы не маем права забываць аб гэтым. Наша задача- зберагчы мір, не дапусціць новых войнаў і разбурэнняў”.

23.04.2021                  Нікіфаровіч І.Ф., заг.Шунеўскай с/б