У пятнічны красавіцкі дзень Празароцкая сельская бібліятэка прэзентавала літаратурнаю візітоўку “У госці да Алены Масла. Пані Чаротная сустракае гасцей”. 

#ДзеньРоднагаСвайго

Бібліятэкар у вобразе пані Чаротнай, карыстаючыся матэрыяламі выдання “Сустрэча з пісьменнікам, або Як зрабіць урок чытання любімым”, пазнаёміла прысутных з пісьменніцай Аленай Масла і яе кнігамі з фонду бібліятэкі.

Пад час мерапрыемства быў зроблены акцэнт на пазнавальны характар твораў Алены Сцяпанаўны. Разам з галоўнымі героямі дзеці знаёміліся з навукова-папулярнымі выданнямі, вучылі заклічкі да божай кароўкі, гучна чыталі казку “Мяне завуць Лахнэска”.

Потым госці бібліятэкі гледзелі мультфільм “Лагодны воўк” па казцы і сцэнарыю А.Масла. Створаны на кінастудыі “Беларусьфільм”, у 2025 годзе мультфільм быў прызнаны найлепшым анімацыйным фільмам Мінскага міжнароднага кінафестывалю “Лістапад”.

Затым дзеці частаваліся ў пані Чаротнай “смажанымі смаўжамі, жукамі” (па сакрэту — мармеладнымі) з кісялём, цукеркамі “Родныя словы” і выказвалі сваё разуменне зместу гэтага твора.

З казкамі Алены Масла было ўтульна і гасцінна, бо гэта роднае, сваё!