Да аб’яўленага ў Беларусі Года малой радзімы ў Ломашаўскай сельскай бібліятэцы прайшлі два мерапрыемствы.
Для вучняў 5 класа была падрыхтавана краязнаўчая гадзіна “Традыцыйныя стравы Глыбоччыны – маслены баран і жытні хлеб”, падчас якой прысутныя не толькі даведаліся пра тэхналогіі прыгатавання масленага барана і жытняга хлеба, але і пазнаёміліся з такімі паняццямі, як “Дзяржаўны спіс гісторыка-культурных каштоўнасцей Рэспублікі Беларусь”, “Гiсторыка-культурныя каштоўнасцi”, “Матэрыяльныя гiсторыка-культурныя каштоўнасцi”, “Нематэрыяльныя гiсторыка-культурныя каштоўнасцi”.
Асобнай старонкай мерапрыемства стала знаёмства з гісторыямі жыцця Тэрэсы Янаўны Струй (в. Мацюкова) і Сцепаніды Аляксандраўны Лупач (в. Дзеркаўшчына), якія з’яўляюцца носьбітамі захавання і перадачы тэхналогій прыгатавання азначаных традыцыйных страў Глыбоччыны.
Для вучный 6 класа прайшла медыя-вандроўка “Зямля бацькоў – зямля святая”, падчас якой прысутныя пры дапамозе прэзентацыі прайшліся па некаторых вуліцах горада Глыбокае і пазнаёміліся з гістарычнымі мясцінамі.
Падарожжа атрымалася вельмі цікавым і пазнавальным, бо многія гістарычныя факты і легенды ніхто з прысутных не ведаў і, нават, не мог уявіць, што яны звязаны з горадам Глыбокае. Напрыклад, - ў Глыбокім быў замак; - Сабор Раства Прасвятой Багародзіцы так спадабаўся французскаму імператару Напалеону Банапарту, што ён лічыў, што глыбоцкі храм мае поўнае права стаяць побач з вядомым Саборам Парыжскай Божай маці ў Парыжы, і каб меў магчымасць, то забраў яго з сабою ў Францыю; - у народзе існуе паданне, што Глыбокае будзе існаваць да тае пары, пакуль на калоне, пастаўленай ў гонар Канстытуцыі 3 мая 1791 года, будзе віць сваё гняздо бусел і інш.
Спадзяёмся, што мерапрыемствы, якія мы прысвяцілі малой радзіме, нікога не пакінулі абыякавымі, і вучні зразумелі, што ў сэрцы кожнага беларуса павінен жыць гонар за свой родны край!
22 мая 2018 г., бібліятэкар Ломашаўсккй сельскай бібліятэкі Бондар А.
