Рука па ласцы разьбяра
Крушыне грудзі вызваляла.
У ста гаях ён выбіраў,
А вось такое бракавала.
Прыліпла пасма наўскасы,
Зьнямелі верадныя пальцы,
Нібыта сена накасіў
I стаў у лета пастаяльцам.
Ён адхіляўся незнарок
I закрываў наглуха вочы,
I засынаў у ім прарок,
I прачынаўся голад воўчы.
Ізноў хапаўся за разец.
I аплываў начы агарак.
А ранак пачынаў рудзець
I націскаў, руды, на карак.
А майстра пацеры шаптаў,
I дрэва шэптам паўтарала.
I гэта значыла накшталт:
Краса нікога не карала.
I каб ня плакаць, а пяяць,
Пакутай долю аплаціла.
I ёй на сонейку стаяць,
А не ў цянётах павуціны.
Юрка Голуб "Разьбяр"
4 мая святкуе юбілей Мацюшонак Валерый Зігмунтавіч, народны майстар, разьбяр, загадчык Падсвільскага філіяла Глыбоцкага дома рамёстваў.
Нарадзіўся Валерый Зігмунтавіч ў 1962 годзе ў в. Мнюты Глыбоцкага раёна, скончыў мастацка-графічны факультэт Віцебскага педагагічнага інстытута. Асновамі разьбы і тачэння авалодваў на кафедры дэкаратыўна-прыкладнога мастацтва інстытута. Прафесійна выконвае вырабы з рознымі відамі разьбы і такарнай апрацоўкі.
У выставах удзельнічае з 1989 года. Найбольш значныя: "Горад майстроў" на Славянскім базары ў Віцебску, удзельнічаў у Днях культуры Віцебскай вобласці ў Мінску і Маскве, у выставах I і II фестывалю "Беларусь - мая песня", на фестывалі "Звіняць цымбалы і гармонік" у Паставах, у абласной выставе "Майстры разьбяной справы Віцебшчыны-2009". У канцы 90-х гадоў яго вырабы дэманстраваліся на выставе ў Францыі. Прымаў удзел у святах"Дажынкі" і раённых святах, шлі яго асабістыя выставы.
Сярод яго вучняў ёсць як зусім юныя таленты, так і вопытныя майстры. Валерый Зігмундавіч узнагароджаны дыпломамі многіх выстаў і конкурсаў.
Спяшайцеся павіншаваць майстра і бліжэй пазнаёміцца з яго творчасцю праз відэафільм "Майстра сучаснай эпохі"!
Аб ім :
- Народныя майстры і мастакі Віцебшчыны. — Віцеб. абл. друк., 2011. — 440 с. — С. 329;
- Выстава сямейнай творчасці : пра выставу сям’і Мацюшонкаў з г.п. Падсвілле ў Доме рамёстваў // Веснік Глыбоччыны. — 2003. — 28 чэрвеня.
- Тарасёнак, І. Лепшыя работы майстроў Глыбоччыны на “Славянскім базары” / І.Тарасёнак // Веснік Глыбоччыны— 2009. — 29 ліпеня.
- Панкрат, А. Резные фантазии Валерия Матюшонка / А.Панкрат // Веснік Глыбоччыны— 2013. — 29 мая. — № 43. — С. 1-2
