Скрабатун Уладзімір Іванавіч
Уладзімір Іванавіч Скрабатун нарадзіўся ў 1955 г. у в. Кавалеўшчына Глыбоцкага раёна ў сям’і рабочых. Скончыў Глыбоцкую СШ №2. Службу ў арміі праходзіў у Чэхаславакіі. Пасля заканчэння Мінскага архітэктурна-будаўнічага тэхнікума па размеркаванню быў накіраваны ў Латвію. Там жа паступіў у Рыжскі політэхнічны інстытут.
З 1988 па 1993 гг.. актыўна ўдзельнічаў у нацыянальна-культурным жыцці беларусаў Латвіі. Быў членам рады Латвійскага таварыства беларускай культуры “Світанак”. У 1991 годзе абраны дэлегатам ад беларусаў Латвіі на Устаноўчы сход беларусаў свету “Бацькаўшчына”. У гарадской газеце “Голас Венты” друкаваў матэрыялы аб гісторыі беларускай дыяспары ў Латвіі, як латышскай, рускай, так і беларускай мовах.
У 1993 годзе пераехаў на радзіму ў Глыбокае. У снежні 1994 года заснаваў газету “Вольнае Глыбокае”. З гэтага часу пачалася яго актыўная дзейнасць ў краязнаўстве.
Даследваць Глыбоччыну Уладзімір Скрабатун пачаў яшчэ ў 1970-я, калі вучыўся ў школе. За дзесяцігоддзі сабраў велізарную колькасць матэрыялаў па гісторыі – фотаздымкаў і дакументаў, кніг, успамінаў. Напісаў шмат краязнаўчых артыкулаў, якія друкаваліся ў “Весніку Глыбоччыны”, “Вольным Глыбокім”, “Нашай Ніве”.
Для многіх аматараў гісторыі Глыбоччыны газета “Вольнае Глыбокае” стала першай крыніцай для вывучэння мінулага Бацькаўшчыны. Газета адным радком падае падзеі сусветнага, рэспубліканскага і абласнога масштабу, друкуе артыкулы эканамічнага зместу. Крыніца сусветнай інфармацыі – інтэрнет, БелТА, nn.by. Асвятляе культурныя падзеі рэгіёну.
Рэдакцыя цесна супрацоўнічае з дзяржаўнымі ўстановамі: РАУС, РЦГЭ (санэпідэмстанцыя), АДАІ (ДАІ), МРА “Энерганагляд”, міжнарённая інспекцыя па ахове навакольнага асяроддзя і інш.
Уладзімір Іванавіч займаўся напісаннем кнігі “Памяць. Глыбоцкі раён” (Мінск, 1995). З’яўляецца аўтарам кнігі “Глыбокае на старых паштоўках” (Мінск, 1998).
У 2004 г. падрыхтаваў і выдаў серыю паштовак з відамі Глыбокага, Паставаў, Шаркоўшчыны, Докшыцаў, Мосара і Удзела.
Крыніца:
- «Кола дзён»: каляндар памятных дат Глыбоччыны.– СШ№2, Глыбокае, 2004
- Вікіпэдыя https://be.wikipedia.org/wiki
16.01.2020
- 1100